Муовини Сарвазири Тоҷикистон бо фаъолияти хоҷагиҳои кишоварзӣ, ҷамъоварии пахта ва ҷараёни кишти такрорӣ дар шаҳри Ҳисор шинос шуд

ДУШАНБЕ, 31.07.2025 /АМИТ «Ховар»/. Муовини Сарвазири Ҷумҳурии Тоҷикистон Сулаймон Зиёзода дар шаҳри Ҳисор бо фаъолияти кишоварзони шаҳр аз наздик шинос гардид, иттилоъ медиҳад АМИТ «Ховар» бо истинод ба Мақомоти иҷроияи ҳокимияти давлатии шаҳри Ҳисор.

Муовини Сарвазири Тоҷикистон дар Ҷамъияти саҳомии кушодаи «Агротехсервис» бо минтақаи сохтмони коргоҳи нави истеҳсолӣ, намунаҳои техника ва механизмҳои кишоварзӣ, ки тавассути муҳандисони маҳаллӣ такмил ёфтаанд, шинос шуд.

Сипас, ҷараёни парваришу ҷамъоварии пахта, ҷуворимакка, полезиҳо, меваю сабзавот ва кишти такрориро дар ҷамоатҳои деҳоти Навобод, Ҳисор ва Дурбат назорат намуд.

Изҳори итминон карда шуд, ки барои иҷрои ҳадафҳои гузоштаи Ҳукумати Ҷумҳурии Тоҷикистон дар шаҳри Ҳисор имконият зиёд аст. Ин аст, ки кишоварзони шаҳр дар таъмини амнияти озуқавории мамлакат ба таври шоиста ҳиссаи арзишманд мегузоранд.

АКС: Мақомоти иҷроияи ҳокимияти давлатии шаҳри Ҳисор