Дар Душанбе Форуми дуюми байналмилалӣ оид ба масъалаҳои маъюбӣ доир гардид
ДУШАНБЕ, 15.08.2025 /АМИТ «Ховар»/. 14 август дар шаҳри Душанбе Форуми дуюми байналмилалӣ оид ба масъалаҳои маъюбӣ доир гардид, ки дар он муовини Сарвазири Ҷумҳурии Тоҷикистон Дилрабо Мансурӣ, коршиносони байналмилалӣ аз Туркманистон, Қазоқистон, Узбекистон, Қирғизистон, Ҷумҳурии Исломии Эрон, Ҷумҳурии Федеративии Олмон, ташкилоти маъюбон ва ҷомеаи шаҳрвандӣ иштирок намуданд. Дар ин хусус ба АМИТ «Ховар» аз маркази матбуоти Вазорати тандурустӣ ва ҳифзи иҷтимоӣ хабар доданд.
Дар форум Вазири тандурустӣ ва ҳифзи иҷтимоии аҳолии Ҷумҳурии Тоҷикистон Ҷамолиддин Абдуллозода иброз дошт, ки «шахсони маъюб дар меҳвари сиёсати иҷтимоии мамлакат қарор доранд ва мо тамоми иқтидорро ба фароҳам овардани муҳити дастрас, имконияти баробар ва зиндагии арзанда барои онҳо равона менамоем».
Иттилоъ дода шуд, ки ба ҳолати 1 июни соли 2025 дар ҷумҳурӣ 170 669 нафар маъюбон ба қайд гирифта шудаанд, ки аз ин шумора 35 229 нафар кӯдакон мебошанд. Ҳиссаи маъюбон дар мамлакат 1,6% аҳолиро ташкил медиҳад, ки яке аз нишондодҳои пасттарин дар минтақа аст. Ҳамасола беш аз 12 ҳазор нафар маъюбон бо воситаҳои техникии тавонбахшӣ таъмин гардида, ҳазорҳо нафар аз имтиёзҳои табобатӣ ва истироҳатӣ истифода мебаранд.
Муовини Сарвазири Ҷумҳурии Тоҷикистон Дилрабо Мансурӣ аз дастгирӣ ва таваҷҷуҳи роҳбарияти олии Ҳукумати мамлакат нисбат ба табақаҳои осебпазири аҳолӣ, махсусан маъюбон ёдовар шуда, иброз дошт, ки ин қишри ҷомеа таҳти ғамхории Пешвои миллат муҳтарам Эмомалӣ Раҳмон қарор доранд.
Форум идомаи мантиқии чорабинии соли 2019 буда, ҳадафи он тақвияти ҳамкории минтақавӣ ва байналмилалӣ, баррасии таҷрибаи татбиқи Конвенсияи Созмони Милали Муттаҳид «Дар бораи ҳуқуқи маъюбон», муайян намудани мушкилоти мавҷуда ва таҳияи тавсияҳо барои ҳалли онҳо мебошад.
Дар Тоҷикистон Махзани ягонаи иттилоотӣ оид ба маъюбон фаъол аст, ки барои банақшагирии сиёсати давлатӣ маълумоти муфассал фароҳам меорад.
АКС: Маркази матбуоти Вазорати тандурустӣ ва ҳифзи иҷтимоии аҳолии Ҷумҳурии Тоҷикистон
Дар ноҳияи Айнӣ оид ба пешгирии истифодаи ғайриқонунии неруи барқ вохӯрӣ баргузор шуд
Дар ноҳияи Ҷаббор Расулов оид ба истифодаи сарфакоронаи неруи барқ вохӯрӣ доир гардид
Дар Душанбе фаъолияти лоиҳаи «Миллати солими Тоҷикистон» натиҷагирӣ карда шуд
Дар Намоиш-озмуни ҷумҳуриявии «Беҳтарин лоиҳаи меъморӣ ва шаҳрсозӣ» ғолибон муайян гардиданд
Дар Беморхонаи клиникавии шаҳрии №1-шаҳри Хуҷанд бинои инноватсионӣ бунёд карда мешавад
Низоми ҷамъоварӣ ва истифодаи маълумоти омории соҳаи тандурустии Тоҷикистон баррасӣ гардид
Намояндагони Тоҷикистон дар машварати минтақавӣ дар Қирғизистон иштирок намуданд
Дар Файзобод бо иштироки муовини Сарвазири Тоҷикистон ҷаласаи Шурои миллӣ барои инкишофи барвақтии кӯдакон доир шуд
ИМРӮЗ — РӮЗИ КОРМАНДОНИ СОҲАИ СОХТМОН. Бинокоронро ободгари зиндагии мардум меноманд
Ҳамкории Тоҷикистон бо Барномаи рушди СММ дар соҳаи ҷавонон ва варзиш тақвият меёбад
Дар Агентии суғуртаи иҷтимоӣ ва нафақа андозаҳои нави нафақаҳоро номбар намуданд
НИШАСТИ МАТБУОТӢ. Дар шашмоҳаи якуми соли 2025 беш аз 58 ҳазор шаҳрвандон ба нафақа баромадаанд
