Дар шаҳри Исфара Фестивали саводнокии молиявӣ гузаронида шуд

ДУШАНБЕ, 16.08.2025 /АМИТ «Ховар»/. Дар доираи татбиқи «Стратегияи миллии фарогирии молиявии Ҷумҳурии Тоҷикистон барои солҳои 2022-2026» бо ташаббуси Бонки миллии Тоҷикистон дар ҳамбастагӣ бо ташкилоти қарзии молиявӣ, ташкилоти суғуртавӣ ва шарикони рушд дар шаҳри Исфара Фестивали аводнокии молиявӣ гузаронида шуд. Дар ин хусус ба АМИТ «Ховар» аз Бонки миллии Тоҷикистон иттилоъ доданд.

Зимни ифтитоҳи фестивал муовини Раиси Бонки миллии Тоҷикистон Далер Муродализода ва роҳбарияти шаҳри Исфара оид ба «Стратегияи миллии фарогирии молиявии Ҷумҳурии Тоҷикистон барои солҳои 2022-2026», аҳаммият ва зарурати саводнокии молиявии аҳолӣ ва нақши он дар рушди иқтисоди мамлакат сухан намуданд. Гуфта шуд, ки бо мақсади таъмини иҷрои ҳадафҳои пешбининамудаи ин стратегия аз ҷониби Бонки миллии Тоҷикистон ҳамроҳ бо вазорату идораҳои дахлдор, ташкилоти қарзии молиявӣ, ташкилоти суғуртавӣ ва шарикони рушд барои васеъ намудани дастрасии аҳолӣ ба хизматрасонии молиявӣ дар шаҳру ноҳияҳои мамлакат пайваста фестивалҳои саводнокии молиявӣ гузаронида мешаванд.

Бо тавсия ва ташаббуси Бонки миллии Тоҷикистон аз ҷониби ташкилоти қарзии молиявӣ дар шаҳру ноҳияҳои мамлакат, бахусус минтақаҳои дурдаст бо гурӯҳҳои мақсадноки аҳолӣ, аз ҷумла хонандагони муассисаҳои таҳсилоти миёнаи умумӣ, миёнаи касбӣ ва олӣ, кормандони корхонаву ташкилоти давлатӣ ва хусусӣ, занон ва муҳоҷирон низ чорабиниҳои маърифатӣ гузаронида мешаванд. Мақсад аз он баланд бардоштани сатҳи саводнокии молиявии истифодабарандагони хизматрасонии молиявӣ мебошад.

Фестивалҳои саводнокии молиявӣ на танҳо чорабинии омӯзишӣ, балки имкони мусоид барои муошират бо коршиносон, мубодилаи таҷриба ва шиносоӣ бо воситаҳои нави молиявӣ мебошанд.

Дар қисмати аввали фестивал мутахассисони Бонки миллии Тоҷикистон, ташкилоти қарзии молиявӣ ва суғуртавӣ бо иштирокдорон дар мавзуъҳои гуногун, аз ҷумла «Бартарияти пардохтҳои ғайринақдӣ», «Пешгирии амалҳои қаллобони молиявӣ», «Муҳимияти пасандозгузорӣ», «Нақши ташкилоти молиявӣ дар баланд бардоштани сатҳи саводнокии молиявии аҳолӣ», «Мафҳум ва муҳимияти суғуртаи молу мулк» суҳбат намуда, оид ба таҷрибаҳои пешрафта ва муосир маълумот доданд. Зимни чорабинӣ озмуни саволу ҷавоб доир гардида, иштирокдорони фаъол бо туҳфаҳои хотиравӣ қадрдонӣ карда шуданд.

Қисмати дуюми фестивал дар майдони назди Қасри фарҳанги шаҳри Исфара баргузор гардида, ташкилоти қарзии молиявӣ ва суғурта ба тамошобинони фестивал маҳсулоти худро муаррифӣ намуданд. Қисми сеюми фестивали саводнокии молиявӣ, яъне барномаи фароғатӣ-фарҳангӣ бо иштироки ҳунармандони маъруф дар майдони марказии шаҳри Исфара баргузор гардида, ташкили озмуни бурди туҳфаҳо дар асоси саволу ҷавоб доир ба донишҳои молиявӣ фазои чорабиниро боз ҳам идона намуд.

Дар хотима изҳори боварӣ карда шуд, ки чунин фестивалҳо ба баланд бардоштани сатҳи саводнокии молиявии истифодабарандагони хизматрасонии молиявӣ мусоидат намуда, ба татбиқи ҳадафҳои пешбининамудаи «Стратегияи миллии фарогирии молиявии Ҷумҳурии Тоҷикистон барои солҳои 2022-2026» мусоидат мекунад.

АКС: Бонки миллии Тоҷикистон