Дар шаҳри Ҳисор даври сеюми Озмуни ҷумҳуриявии «Фурӯғи субҳи доноӣ китоб аст» идома дорад

ДУШАНБЕ, 16.08.2025 /АМИТ «Ховар»/. 14 август Раиси шаҳри Ҳисор, раиси Комиссияи даври сеюми Озмуни ҷумҳуриявии «Фурӯғи субҳи доноӣ китоб аст» дар шаҳру ноҳияҳои тобеи ҷумҳурӣ Ҷаббор Носирзода бо ҷараёни баргузории озмун дар китобхонаи марказии шаҳри Ҳисор шинос шуд.

Тавре АМИТ «Ховар» бо истинод ба Мақомоти иҷроияи ҳокимияти давлатии шаҳри Ҳисор хабар медиҳад, дар даври сеюми озмун 443 нафар довталабон аз шаҳру ноҳияҳои тобеи ҷумҳурӣ иштирок менамоянд.

Ҷаббор Носирзода бо утоқҳое, ки дар онҳо санҷиши довталабон аз рӯи номинатсияҳои «Адабиёти классикии тоҷик», «Адабиёти муосири тоҷик», «Адабиёти кӯдакону наврасон ва осори шифоҳӣ» ва «Адабиёти ҷаҳон» баргузор мегардид, шинос шуда, бо ҳакамон, довталабон, устодон ва падару модарон суҳбат намуд.

Таъкид гардид, ки Мақомоти иҷроияи ҳокимияти давлатии шаҳри Ҳисор барои озоду шаффоф баргузор гардидани озмун тамоми тадбирҳоро андешида, шароити хуб фароҳам овардааст.

Ҳамзамон аз донишу суханварии довталабон ва муносибати мунсифонаи ҳакамони озмун нисбат ба довталабон изҳори қаноатмандӣ карда шуд.

АКС: Мақомоти иҷроияи ҳокимияти давлатии шаҳри Ҳисор