НИШАСТИ МАТБУОТӢ. Палатаи ҳисоб дар беш аз 14 ҳазор ҳолат вайронкунии қоидаҳои молиявиро ба маблағи 628,2 миллион сомонӣ муайян намуд

Август 7, 2025 09:14

ДУШАНБЕ, 07.08.2025 /АМИТ «Ховар»/. Бо мақсади таъмини арзёбии саривақтию сифатноки даромад ва хароҷоти буҷети давлатӣ, истифодаи мақсадноку самараноки маблағҳои буҷетӣ ва воситаҳои давлатӣ Палатаи ҳисоб дар вазорату идораҳо, марказ ва гурӯҳҳои татбиқи лоиҳаҳои сармоягузорӣ, бонкҳо, субъектҳои хоҷагидорӣ ва дигар муассисаҳо 71 чорабинии аудиторӣ гузаронида, дар 14 ҳазору 147 ҳолат вайронкунии қоидаҳои молиявиро ба маблағи умумии 628,2 миллион сомонӣ муайян намуд. Дар ин хусус Раиси Палатаи ҳисоби Ҷумҳурии Тоҷикистон Ҷамшед Каримзода имрӯз зимни нишасти матбуотӣ ба доираи васеи хабарнигорон иттилоъ дод.

Ҷамшед Каримзода гуфт, ки аз ҷумла, вайронкунии қоидаҳои молиявии дорои хусусияти расмӣ дар 606 ҳолат ба маблағи 389,4 миллион сомонӣ ва вайронкунии қоидаҳои низоми молиявӣ дар 13 ҳзаору 282 ҳолат ба маблағи 238,8 миллион сомонӣ муайян гардид. Аз маблағи умумии вайронкунии низоми молиявии муайянгардида қоидавайронкуниҳо вобаста ба ташаккул ва иҷрои буҷети давлатӣ, 114,3 миллион сомонӣ, пешбурди баҳисобгирии муҳосибӣ ва ҳисоботи молиявӣ 100,6 миллион сомонӣ, идоракунии моликияти давлатӣ 9,5 миллион сомонӣ ва дар соҳаи сохтмон 14,4 миллион сомониро ташкил медиҳад.

Ба андешаи Ҷамшед Каримзода, натиҷаи чорабиниҳои аудиторӣ муайян намуд, ки ба камбудию норасоиҳои молиявӣ, хусусан дар Вазорати тандурустӣ ва ҳифзи иҷтимоии аҳолӣ ва сохторҳои он 5,8 миллион сомонӣ, Агентии таъминоти амволи махсус ва сохторҳои он 5,3 миллион сомонӣ, Раёсати сохтмони асосии назди Вазорати маориф 482,2 ҳазор сомонӣ, Муассисаи давлатии «Коллеҷи фарҳанги ҷумҳуриявии ба номи П. Буйдоқов»-и ноҳияи Рӯдакӣ 118,3 ҳазор сомонӣ роҳ дода шудааст.

Таъкид гардид, ки зимни гузаронидани чорабиниҳои аудиторӣ вобаста ба иҷрои нақшаи қисми даромади буҷети давлатӣ барои соли 2024 дар муносибат ба фаъолияти якчанд корхона ва ташкилоту муассисаҳои давлатӣ ва ғайридавлатӣ ба маблағи 24 миллион сомонӣ вайронкунии қоидаҳои молиявӣ муайян ва барқарор карда шуд.

«Барои таъмини арзёбии истифодаи самаранок ва мақсадноки маблағҳои буҷетӣ дар ин давра чорабиниҳои аудиторӣ оид ба баҳодиҳӣ ба ташаккул ва иҷрои қисми даромад ва хароҷоти буҷетҳои маҳаллӣ дар шаҳри Душанбе, ноҳияҳои Исмоили Сомонӣ, Файзобод, ноҳияҳои Абдураҳмони Ҷомӣ ва Мир Саид Алии Ҳамадонии вилояти Хатлон ва ноҳияи Шуғнони Вилояти Мухтори Кӯҳистони Бадахшон низ гузаронида шуданд. Зимни он қоидавайронкуниҳои молиявӣ ба маблағи 14,2 миллион сомонӣ муайян ва барқарор карда шуд»,- иброз намуд дар нишасти матбуотӣ Ҷамшед Каримзода.

Раъно НУСРАТУЛЛО,
АМИТ «Ховар»

АКС: АМИТ «Ховар»

Август 7, 2025 09:14

Хабарҳои дигари ин бахш

Дар Душанбе таҳкими ҳамкорӣ вобаста ба конфронси СИТЕС баррасӣ шуд
Шуруъ аз 16 сентябр дар масири Сиан-Душанбе парвозҳои мустақими ҳавоӣ оғоз мегарданд
Тоҷикистон ва Иттиҳоди Аврупо ҳамкориро дар соҳаи энергетика ва захираҳои об тақвият медиҳанд
Сарвазири мамлакат Қоҳир Расулзода дар ноҳияи Кӯшониён бо ҷараёни корҳои созандагӣ ва хоҷагидорӣ шинос шуд
Сиёсати Тоҷикистон дар самти идоракунии ҳамгироёнаи захираҳои об дар Шветсия муаррифӣ карда шуд
Бонки аврупоии таҷдид ва рушд барои таҷдиди низоми нақлиёти шаҳри Душанбе маблағ ҷудо менамояд
Дар Минтақаи озоди иқтисодии «Данғара» татбиқи лоиҳаҳои муштарак бо сармоягузорони Чин баррасӣ карда шуд
Дар Неругоҳи барқи обии «Роғун» роботи махсуси кафшерӣ ба истифода дода шуд
Роҳҳои афзоиш додани ҳаҷми истеҳсол ва коркарди нахи пахта дар Тоҷикистон баррасӣ гардид
Дар Чин масъалаи вазъи заминҳои шӯр ва ишқордор баррасӣ шуд
Ангури хуштаъми Тоҷикистон дар бозорҳои шаҳри Самара ба фурӯш гузошта шудааст
Рақамикунонии соҳаи замин дар Тоҷикистон бо ҳайати Бонки рушди Осиё баррасӣ шуд