Ғолибони даври шаҳрии озмунҳои «Беҳтарин ҳамсар» ва «Фарзанд – боғи падару модар» ба даври ҷумҳуриявӣ роҳ ёфтанд

Август 14, 2025 17:00

ДУШАНБЕ, 14.08.2025 /АМИТ «Ховар»/. Дар шаҳри Душанбе бо ибтикори Раёсати кор бо занон ва оилаи Мақомоти иҷроияи ҳокимияти давлатии шаҳри Душанбе ҳамоиши сиёсӣ — фарҳангӣ таҳти унвони «Нақши оила дар рушди давлат ва ҷомеа» ва ҷамъбасти даври шаҳрии озмунҳои «Беҳтарин ҳамсар» ва «Фарзанд – боғи падару модар» баргузор гардид. Дар ин хусус АМИТ «Ховар» бо истинод ба Мақомоти иҷроияи ҳокимияти давлатии шаҳри Душанбе иттилоъ медиҳад.

Дар ҳамоиш иброз гардид, ки бо шарофати сиёсати пешгирифтаи  Президенти Ҷумҳурии Тоҷикистон муҳтарам Эмомалӣ Раҳмон дар таърихи навини давлатдориамон оила чун рукни муҳими давлат эътироф гардидааст. Бузургтарин ҳадафе, ки имрӯз дар назди Ҳукумати мамлакат қарор дорад, бунёди ҷомеаи ҳуқуқбунёд, дунявӣ ва демократӣ мебошад.

Ҳукумати мамлакат ба масъалаҳои ҳуқуқиву иҷтимоии марбут ба солимӣ ва пойдории оилаҳо таваҷҷуҳи хосса зоҳир намуда, дар самти таҳкими заминаҳои ташаккули оила ва дастгирии оилаҳо, ҳифзи ҳуқуқҳои аъзои оила якчанд санадҳои меъёри ҳуқуқиро ба тасвиб расонидааст, ки мавриди амал қарор доранд.

Мақсади қабули қонуну қарорҳо аз ҷониби Ҳукумати Тоҷикистон таъмини ҳифзи ҳуқуқу манфиатҳои оила ва аъзои оила ҳамчун ниҳоди иҷтимоӣ ва макони тарбияи фарзанд, тақвияти заминаҳои иқтисодию иҷтимоии таҳкими оила ва баланд бардоштани маърифати оиладорӣ мебошад.

Ҳадаф аз баргузории озмунҳо баланд бардоштани масъулияти оила дар таҳкими фарҳанги оиладорӣ ҳамчун арзиши муҳими иҷтимоӣ, меҳру муҳаббати самимӣ байни ҳамсарон, тарбияи дурусти насли солиму ояндасози миллат, нигоҳдорандаи фарҳанг, анъанаҳои миллӣ, маънавӣ ва ахлоқӣ дар муносибатҳои оилавӣ, тақвияти мақом ва нақши оила дар ҷомеа, боло бурдани маърифати ҳуқуқии аъзои оила ва рӯзгордории оилаҳо мебошад.

Дар даври шаҳрии озмуни «Ҳамсари беҳтарин» бештар ба мардҳо афзалият дода шуд. Яъне, марди оила бояд ҳамаҷониба рушдёфта бошад, нисбат ба аъзои оила ва сатҳи маърифатнокии аҳли оила муносибати хуб дошта, дар илмомӯзию касбомӯзии онҳо, меҳнатпарастию меҳнатдӯстии фарзандон, таъмини шароити муносиб барои кору таҳсил, ҷалби фарзандон ба варзиш ва корҳои ҷамъиятӣ ва дигар самтҳои рушди оила саҳмгузор бошад.

Иштирокчиён дар даври шаҳрии озмуни «Фарзанд – боғи падару модар» бояд дорои маълумоти миёнаи умумӣ, касбӣ ва олӣ, ҳунарманд, иштирокчии фаъоли озмунҳо, олимпиадаҳо ва чорабиниҳои варзишӣ, китобхон ва соҳибсухан, намунаи ибрати наврасону ҷавонон дар масъалаи ба ҷо овардани эҳтироми падару модар, калонсолон ва дар байни ҷомеа бо рафтору гуфтори ҳамида намунаи ибрати дигарон бошанд.

Дар анҷом ғолибони даври шаҳрии озмунҳои «Беҳтарин ҳамсар» ва «Фарзанд – боғи падару модар» муайян гардида, ба даври ҷумҳуриявии озмунҳо роҳ ёфтанд.

 АКС: Мақомоти иҷроияи ҳокимияти давлатии  шаҳриДушанбе

Август 14, 2025 17:00

Хабарҳои дигари ин бахш

Иҷлосияи сеюми Маҷлиси вакилони халқи шаҳри Душанбе, даъвати ҳафтум баргузор шуд
«САЙРИ ДУШАНБЕ». Ба муносибати Рӯзи ҷаҳонии сайёҳӣ дар пойтахт хатсайри ройгон ташкил карда мешавад
Имрӯз иҷлосияи сеюми Маҷлиси вакилони халқи шаҳри Душанбе, даъвати ҳафтум баргузор мегардад
Дар Душанбе Рӯзи забони давлатӣ дар сатҳи баланд таҷлил карда мешавад
DITE-2025: Душанбе ба маркази нави сайёҳии байналмилалӣ табдил меёбад
DITE-2025. Зиёда аз 10 ҳазору 500 нафар аз Намоишгоҳи байналмилалии сайёҳии Душанбе дидан намуданд
Масъалаи густариши ҳамкорӣ байни шаҳри Душанбе ва Ҷазираи Киш дар соҳаи сайёҳӣ баррасӣ шуд
Дар доираи баргузории Намоишгоҳи байналмилалии сайёҳии Душанбе ҷаласаи панелӣ ва дарси маҳорат доир гардиданд
«ГАНҶИНАИ МЕРОС». Дар Душанбе Фестивал — намоиши либосҳои миллӣ баргузор гардид
Дар Намоишгоҳи байналмилалии сайёҳии Душанбе беш аз 200 ширкати хизматрасони соҳа иштирок дорад
Намоишгоҳи байналмилалии сайёҳии Душанбе-2025 оғоз гардид
Намоишгоҳи байналмилалии сайёҳии Душанбе баргузор мегардад