ОМОДАГӢ БА СОЛИ НАВИ ТАҲСИЛ. Дар шаҳри Ҳисор се мактаби нав ба истифода дода мешавад

ДУШАНБЕ, 22.08.2025 /АМИТ «Ховар»/. Бо мусоидати Мақомоти иҷроияи ҳокимияти давлатии шаҳри Ҳисор дар остонаи ҷашни 34-солагии Истиқлоли давлатии Ҷумҳурии Тоҷикистон, оғози соли нави таҳсили 2025-2026 ва Рӯзи дониш дар шаҳри Ҳисор се муассисаи таълимии нав бо 74 синфхона мавриди истифода қарор мегирад. Дар ин хусус ба хабарнигори АМИТ «Ховар» муовини Раиси шаҳри Ҳисор Бунафша Юлдошзода хабар дод.

Иттилоъ дода шуд, ки дар шаҳр ҳамзамон 6 бинои иловагии мактаб бо 104 синфхона, дар маҷмуъ 178 синфхона барои 8 ҳазору 900 хонанда дар ду баст ба истифода дода мешавад. Яъне, дар шаҳри Ҳисор қариб 9 ҳазор ҷойи нави нишаст дар ду баст таъсис меёбад.

Муовини Раиси шаҳри Ҳисор иброз намуд, ки се муассисаи таълимии нав дар Рӯзи дониш дар мавзеи Уртабузи Ҷамоати шаҳраки Шарора, маҳаллаи Тӯдаи Ҷамоати деҳоти Мирзо Ризо ва кӯчаи ба номи Файзулло Абдуллоеви шаҳраки Ҳисор ифтитоҳ карда мешаванд. Бо назардошти афзоиши аҳолӣ дар шаҳри Ҳисор дар соли нави таҳсили 2025-2026 дар шаҳр қариб даҳ ҳазор кӯдак бори нахуст ба мактаб мераванд.

Бояд гуфт, ки барои сохтмони муассисаҳои нави таълимӣ ва дигар синфхонаҳои иловагӣ аз ҷониби Мақомоти иҷроияи ҳокимияти давлатии шаҳри Ҳисор беш аз 107 ҳазор дона хишт тақсим карда шуд. «Дар сохтмони биною синфхонаҳои иловагӣ соҳибкорони маҳаллӣ ва шахсони саховатманд низ нақши босазо мегузоранд. Сохтмони биноҳои муассисаҳои таълимии замонавӣ дар муддати 7-8 моҳ сохта шуда, бо назардошти афзоиши аҳолӣ аз се қабат иборат мебошанд»,- иброз намуд Бунафша Юлдошзода.

Ҳоло дар шаҳри Ҳисор 135 муассисаи таълимӣ фаъолият дошта, дар онҳо беш аз 86 ҳазор хонандагон ба таҳсил фаро гирифта шудаанд.

Бо дахли таъмини хонандагон бо либосҳои мактабӣ ва дигар асбобу аёният Бунафша Юлдолшзода иттилоъ дод, ки дар марказҳои савдою тиҷоратӣ, ба мисли В1 ва бозору мағозаҳои шаҳри Ҳисор бо мақсади дастрас намудани либос ва дигар ашёи хониш барои хонандагон ярмаркаҳо ташкил карда шудаанд. Дар онҳо либосҳои мактабӣ ва ашёи хониш бо нархҳои дастрас фурӯхта мешаванд.

Бо мақсади таъмину муҷаҳҳаз намудани муассисаҳои таълимӣ ва баланд бардоштани сатҳу сифати таълим бо дастгирии Раиси шаҳри Ҳисор дар остонаи соли нави хониши 2025-2026 ба муассисаҳои таълимии шаҳр 1000 ҷуфт мизу курсӣ, тахтаи синф ва дигар асбобу анҷоми хониш тақсим карда мешавад.

Яке аз ҳадафҳои асосии Мақомоти иҷроияи ҳокимияти давлатии шаҳри Ҳисор дар радифи фароҳам овардани шароити мусоиди таълим ва бунёди мактабҳо инчунин баланд бардоштани сифати таҳсил дар мактабҳо мебошад. Дар ин самт дар ҳамкорӣ бо аҳли маорифи шаҳр ва волидайни хонандагон ҳамкории судманд ба роҳ монда шуда, тадбирҳои зарурӣ андешида мешаванд.

Ҳамзамон дар доираи сиёсати маорифпарваронаи Пешвои миллат муҳтарам Эмомалӣ Раҳмон дар шаҳри Ҳисор сохтмони чор муассисаи томактабӣ ва нуҳ маркази инкишофи кӯдак дар назар дошта шудааст. Сохтмони баъзе аз ин муассисаҳо аллакай оғоз гардидааст. Инчунин дар назди 22 муассисаи таълимӣ таъмиру муҷчаҳазгардонии 22 маркази инкишофи кӯдак идома дорад, ки барои фарогирии беш аз 2 ҳазор кӯдак ба таълиму тарбия пешбинӣ шудааст.

Дар маҷмуъ, аҳли маорифи шаҳри Ҳисор соли нави таҳсили 2025-2026-ро бо навгониҳо ва дастовардҳои беназир истиқбол намуда, сайъ доранд, ки бо назардошти фароҳам гардидани имконоти васеъ дар соҳаи маориф дар таълиму тарбияи насли наврас ва ояндасози миллат саҳми муносиб гузоранд. Зеро пешрафти ҳар давлат ва миллат аз соҳаи маориф, ки яке аз соҳаҳои афзалиятнок ва калидӣ аст, сарчашма мегирад.

Марзия САИДЗОДА,
АМИТ «Ховар»

АКС: Мақомоти иҷроияи ҳокимияти давлатии шаҳри Ҳисор