Доир ба Истиқлоли давлатӣ ва рушди низоми ҳуқуқии миллӣ конференсияи ҷумҳуриявӣ баргузор шуд

ДУШАНБЕ, 11.09.2025 /АМИТ «Ховар» /. «Истиқлоли давлатӣ ва рушди низоми ҳуқуқии миллӣ»-таҳти ин унвон дар Академияи идоракунии давлатии назди Президенти Ҷумҳурии Тоҷикистон бахшида ба 34-солагии Истиқлолияти давлатии Ҷумҳурии Тоҷикистон конференсияи ҷумҳуриявии илмӣ-назариявӣ баргузор гардид. Дар ин хусус ба АМИТ «Ховар» аз академия хабар доданд.

Ноиби ректор оид ба илм ва инноватсияи академия Карамалӣ Карамалишоев иброз намуд, ки Истиқлоли давлатӣ чун пайки озодӣ ва соҳибдавлатӣ тақозо менамояд, ки насли имрӯз барои бегазандӣ ва ҳифзи он аз ҳар гуна таҳдидҳои ҷаҳони муосир пайваста талош намояд.

Дар конференсия зиёда аз 20 маърузаи илмӣ мавриди баррасӣ қарор гирифт, ки фарогирандаи паҳлуҳои гуногуни ҳуқуқии ҳифзи Истиқлоли давлатӣ буданд. Аз ҷумла, «Ислоҳоти конститутсионӣ ҳамчун василаи амалигардонии ҳуқуқӣ ва аҳамияти он дар таҳкими низоми давлатдории Тоҷикистон», «Истиқлоли давлатӣ ва нақши он дар ташаккули низоми ҳуқиқии Ҷумҳурии Тоҷикистон», «Рушди низоми ҳуқуқии Тоҷикистон дар солҳои соҳибистиқлолӣ», «Ҷаҳонишавии ҳуқуқ ва таъсири он ба низоми ҳуқуқии миллӣ», «Нақши Истиқлоли давлатӣ дар ташаккули ҳокимияти конститутсионӣ: ҷанбаҳои сиёсӣ ва ҳуқуқӣ» ва ғайра аз ин ҷумла буданд.

Зимни баррасии ин мавзуъҳо олимон оид ба ҳифзи Истиқлоли давлатӣ ва мукаммал намудани қонунгузории миллӣ дар ин самт пешниҳодҳо манзур намуданд.

Иштирокчиён баргузории чунин конференсияи сатҳи баландро нишон аз Ваҳдати миллӣ, тинҷиву амонӣ ва самараи Истиқлоли давлатӣ арзёбӣ намуданд. Изҳори умед карда шуд, ки конференсия дар ҳифзи Истиқлоли давлатӣ, баланд бардоштани сатҳи донишҳои ҳуқуқии мутахассисони соҳа, инкишофи соҳаҳои гуногуни ҳуқуқ ва таҳкими қонунгузории Ҷумҳурии Тоҷикистон нақши арзанда мегузорад.

АКС: Академияи идоракунии давлатии назди Президенти Ҷумҳурии Тоҷикистон