ИСТИФОДАИ САМАРАНОКИ ЗАМИН. Фаъолияти Абдурауф Зиёев дар шаҳри Панҷакент барои ҳамдеҳагонаш намунаи ибрат аст

ДУШАНБЕ, 16.09.2025. /АМИТ «Ховар»/. Сокини деҳаи Сӯҷинаи шаҳри Панҷакент Абдурауф Зиёев дар 20 садяк токзори хавозавӣ бунёд карда, 12 навъи ангур парвариш ва соли равон 10 тонна ангур ҷамъоварӣ намуд. Дар ин хусус ба АМИТ «Ховар» аз Мақомоти иҷроияи ҳокимияти давлатии шаҳри Панҷакент хабар доданд.

Абдурауф Зиёев солҳои зиёд аст, ки ба парвариши дарахтони мевадиҳанда ва ток машғул мебошад. Номбурда дар мавзеи Навбаҳор бо фарзандонаш ду хоҷагии деҳқонӣ- «Себзор» ва «Бозори Зиё» таъсис дод. Инчунин  дар  8,5 гектар замини лалмӣ бо роҳи кашидани об боғи нави мевадор ташкил намуд, ки то имрӯз аз он 20 тонна себи хушсифат ҷамъоварӣ ва пешниҳоди харидорон гардид.

Ин хоҷагиҳои деҳқонӣ дар самти кишти зироати мавсимӣ низ фаъол мебошанд. Имсол аз сабзавоти тару тоза, картошкаи барвақтӣ ва зироати хӯроки чорво ҳосили фаровон ҷамъоварӣ намуданд.

Дар замини наздиҳавлияшон бо усули хавозавӣ токзори хурд бунёд ва навъҳои гуногуни себ, нок, анҷиру шафтолу парвариш мекунанд. Таҷрибаи ин деҳқони асил барои дигар сокинони деҳот намунаи ибрат буда, нишон медиҳад, ки бо истифодаи самараноки замин ва меҳнати софдилона метавон зиндагиро обод кард ва дар рушди бозори маҳаллӣ саҳми назаррас гузошт.

АКС: Мақомоти иҷроияи ҳокимияти давлатии шаҳри Панҷакент