Ҳамкории Академияи миллии илмҳои Тоҷикистон бо муассисаҳои илмӣ-таҳқиқотии Италия тақвият дода мешаванд

ДУШАНБЕ, 28.10.2025 /АМИТ «Ховар»/. Масъалаҳои марбут ба таҳкими робитаҳои илмӣ, мубодилаи таҷриба, омодасозии кадрҳои баландихтисос ва татбиқи барномаҳои муштараки илмӣ 27 октябр зимни вохӯрии президенти Академияи миллии илмҳои Тоҷикистон Қобилҷон Хушвахтзода бо ҳайати ниҳоди байналмилалӣ – Ҳамоҳангсози махсуси Осиёи Марказӣ – Италия Федерико Фаилла баррасӣ гардид. Дар ин хусус АМИТ «Ховар» бо истинод ба Академияи миллии илмҳо хабар медиҳад.

Ҷонибҳо омодагии худро барои рушди минбаъдаи робитаҳои илмӣ, татбиқи ташаббусҳои муштарак ва тақвияти муносибатҳои дӯстона байни Тоҷикистон ва Италия изҳор намуданд.

Таъкид гардид, ки  дар оянда бо ҷалби олимон ва марказҳои илмии ду мамлакат лоиҳаҳои муштараки таҳқиқотӣ, машварату конфронсҳои илмӣ ва табодули донишмандон ба роҳ монда мешавад.

Мусоҳибон имкониятҳои ҳамкориро дар самтҳои энергетика, экология, астрономия, геология, зилзиласанҷӣ ва илми биотехнология муҳокима намуданд.

Ҳамчунин пешниҳод гардид, ки барои густариши робитаҳо байни донишгоҳҳо ва марказҳои илмии ҳар ду давлат меморандуми нави ҳамкорӣ таҳия ва ба имзо расонида шавад.

АКС: Академияи миллии илмҳои Тоҷикистон