Байни «Тоҷикфилм» ва шаш киностудияи кишварҳои ИДМ ва хориҷи наздик Ёддошти тафоҳум ба имзо расид

ДУШАНБЕ, 20.10.2025. /АМИТ «Ховар»/. 19 октябр дар шаҳри Душанбе дар доираи Синамоҷашнвораи дуюми байналмилалии Душанбе — «Тоҷи Сомон» ҷаласаи Шурои директорони киностудияҳои кишварҳои Иттиҳоди Давлатҳои Мустақил ва хориҷи наздик баргузор гардид, ки дар он байни Муассисаи давлатии «Тоҷикфилм» ва киностудияҳои миллии шаш давлат Ёддошти тафоҳум ба имзо расид.

Тавре ба АМИТ «Ховар» аз Муассисаи давлатии «Тоҷикфилм» хабар доданд, санадҳо байни студияи филмҳои мустанади Санкт-Петербург «Лендок», Киностудияи миллии «Беларусфилм»-и Беларус, Муассисаи давлатии буҷетии фарҳангии Ҷумҳурии Тотористон «Татаркино», Киноконсерни «Узбекфилм»-и Узбекистон ва Киностудияи миллии «Қирғизфилм» ба номи Т.Окееви Қирғизистон ба имзо расиданд.

Дар ҷараёни ҷаласаи шуро иброз гардид, ки ба имзо расидани ин санадҳо ба таҳкими ҳамкории байналмилалӣ дар соҳаи синамо, табодули таҷриба, рушди робитаҳои фарҳангӣ ва татбиқи лоиҳаҳои муштарак, ки ба пешрафти кинематографияи миллӣ дар арсаи байналмилалӣ равона гардидаанд, мусоидат менамояд.

Директорони киностудияҳо дар ҷаласа масъалаҳои тавсеаи ҳамкорӣ дар самти истеҳсол, кироя ва паҳнкунии филмҳо, табодули таълимӣ, рақамикунии бунёди филмҳо ва таъсиси бойгонии ягонаи расонавии кишварҳои аъзои Иттиҳоди Давлатҳори Мустақилро мавриди баррасӣ қарор доданд.

Ҳамчунин масъулин оид ба таъсиси Шурои ҳамоҳангсозӣ барои банақшагирии лоиҳаҳои истеҳсол ва паҳнкунии муштараки филмҳо, татбиқи барномаҳои омӯзишӣ, мубодилаи мутахассисон ва ташкили намоиши мутақобили филмҳо дар кишварҳои шарик ба мувофиқа расиданд.

Ёдовар мешавем, ки ҷаласаи Шурои директорони киностудияҳои кишварҳои аъзои Иттиҳоди Давлатҳои Мустақил ва хориҷи наздик бо иштироки роҳбарони киностудияҳои миллӣ, марказҳои синамоии давлатӣ ва иттифоқҳои эҷодӣ аз Федератсияи Русия, Беларус, Озарбойҷон, Тоҷикистон, Қазоқистон, Қирғизистон, Узбекистон, Эрон, Гурҷистон, Афғонистон ва Тотористон гузаронида шуд.

АКС: Муассисаи давлатии «Тоҷикфилм»