НИШАСТИ МАТБУОТӢ. Дар доираи Стратегияи рушди соҳаи алоқа сатҳу сифати алоқаи мобилӣ ва интернет 100 % таъмин карда мешавад
ДУШАНБЕ, 28.01.2026 /АМИТ «Ховар»/. Президенти Ҷумҳурии Тоҷикистон муҳтарам Эмомалӣ Раҳмон зимни пешниҳоди Паём ба Маҷлисӣ Олӣ ба Хадамоти алоқаи назди Ҳукумати Ҷумҳурии Тоҷикистон дастуру супориш доданд, ки дар асоси ҳадафу вазифаҳои стратегии мамлакат лоиҳаи «Стратегияи рушди соҳаи алоқаи Ҷумҳурии Тоҷикистон барои давраи то соли 2040»-ро таҳия ва ба Ҳукумати мамлакат пешниҳод намояд.
28 январ зимни нишасти матбуотии Хадамоти алоқаи назди Ҳукумати Ҷумҳурии Тоҷикистон ба суоли хабарнигори АМИТ «Ховар» дар мавриди он, ки дар доираи ин стратегия сатҳу сифати алоқаи мобилӣ ва интернет, ки имрӯзҳо аксар сокинон аз он шикоят доранд, то куҷо таъмин карда мешавад, сардори ин хадамот Исфандиёри Саъдулло посух дод, ки лоиҳаи «Стратегияи рушди соҳаи алоқаи Ҷумҳурии Тоҷикистон барои давраи то соли 2030» аллакай таҳия гардида, натиҷаи ниҳоии он коркард мешавад.
«Дар назар аст, ки дар доираи ин стратегия сатҳи воридшавии интернети фарох, баланд бардоштани интернети собит, суръати миёнаи интернети мобилӣ, ҳиссаи фарогирии роҳҳои автомобилгард бо алоқаи мобилии 4G ва 5G то 100 фоиз расонида шавад», – иброз дошт Исфандиёри Саъдулло.
Сардори ин хадамот иттилоъ дод, ки дар доираи ин стратегия Тоҷикистон то соли 2027 ба интернети 4G ва то соли 2030 ба интернети 5 G 100% пайваст карда мешавад.
«Баъд аз қабули ин стратегия аз ҷониби Ҳукумати Ҷумҳурии Тоҷикистон умедворем, ки он нияту натиҷаҳоеро, ки мо интизор ҳастем, барои баланд бардоштани сатҳу сифати соҳаи алоқа ба даст меорем», — гуфт Исфандиёри Саъдулло.
Дар нишасти матбуотӣ яке аз омилҳои паст будани сифати интернети мобилиро дар мамлакат дар 5 соли охир 10 баробар (аз 3 Гбайт ба 30 Гбайт) зиёд гардидани талабот ба интернет арзёбӣ гардид.
«Мушкили суръати пасти интернет ҳоло танҳо дар алоқаи мобилӣ аст ва дар интернети собит (ноқилӣ) ин мушкилӣ вуҷуд надорад», – гуфта шуд зимни нишасти матбуотӣ.
Моҳинави НАВРӮЗ,
АМИТ «Ховар»
АКС: АМИТ «Ховар»
Тоҷикистон ва Эрон дар самти густариши ҳамкории саноатӣ ва тиҷоратӣ ба мувофиқа расиданд
Дар Душанбе тақвияти ҳамкории гумрукӣ байни Тоҷикистон ва Узбекистон баррасӣ гардид
Дар ҷаласаи гурӯҳи корӣ масъалаи пешгирии талафот ва истифодаи ғайриқонунии неруи барқ баррасӣ шуд
Ҷаласаи муштараки гурӯҳи корӣ ва муколамаи миллии сиёсӣ оид ба идоракунии захираҳои об баргузор гардид
Ҳаҷми гардиши савдо байни Тоҷикистон ва Эрон 483,9 миллион доллари амрикоиро ташкил дод
Тоҷикистон бо Бонки Осиёии Рушд дар самти рақамикунонии фаъолияти гумрукӣ ҳамкориро густариш медиҳад
Муовини Сарвазири Тоҷикистон бо корҳои созандагию ободонӣ дар ноҳияи Ёвон шинос гардид
Дар Душанбе ҷаласаи 13-уми Комиссияи байниҳукуматӣ оид ба ҳамкории тиҷоратӣ ва иқтисодии Тоҷикистону Узбекистон баргузор шуд
Байни Тоҷикистон ва Гурӯҳи Бонки ҷаҳонӣ барои бунёди хати интиқоли барқ дар Тоҷикистон Созишномаи молиявии грантӣ ба имзо расид
Вазири саноат, маъдан ва тиҷорати Ҷумҳурии Исломии Эрон ба Тоҷикистон ташриф овард
Дар Хатлон дар беш аз 64 ҳазор гектар тухмгузории малахи марокашӣ ба қайд гирифта шудааст
Ба иқтисоди Тоҷикистон соли 2025 қариб 7 миллиард доллар сармояи хориҷӣ ворид гардид
