Ҷаласаи якуми Шурои байниҳукуматии Ҷумҳурии Тоҷикистон ва Ҷумҳурии Қирғизистон баргузор шуд

ДУШАНБЕ, 13.02.2026 /АМИТ «Ховар»/. Дар шаҳри Бишкеки Ҷумҳурии Қирғизистон бо иштироки Сарвазири Ҷумҳурии Тоҷикистон Қоҳир Расулзода ва  Раиси Девони Вазирон — Роҳбари Дастгоҳи Президенти Ҷумҳурии Қирғизистон Адилбек Касималиев ҷаласаи якуми Шурои байниҳукуматии Ҷумҳурии Тоҷикистон ва Ҷумҳурии Қирғизистон баргузор гардид.

Дар ҷаласа масъалаҳои вобаста ба рушди ҳамкории байниҳукуматӣ дар соҳаҳои иқтисоду тиҷорат, нақлиёт ва логистика, гумрук, фарҳанг, сайёҳӣ ва дигар соҳаҳои мавриди таваҷҷуҳ баррасӣ гардид.

Тавре таъкид карда шуд, соли 2025 марҳилаи таърихӣ дар муносибатҳои байни Тоҷикистон ва  Қирғизистон ба ҳисоб рафта, сатҳи баланди муколамаи сиёсии дуҷониба ва уҳдадории ду кишварро барои бунёди низоми устувори муносибатҳои байнидавлатӣ собит менамояд.

Анҷоми бомуваффақияти раванди делимитатсияи сарҳади давлатии Тоҷикистон ва Қирғизистон ҳамчун омили муҳими таҳкимбахши  амният ва субот на танҳо дар ду кишвар, балки дар тамоми минтақа арзёбӣ гардид.

Таъкид карда шуд, ки Шурои байниҳукуматии навтаъсиси Тоҷикистон ва Қирғизистон ҳамчун механизми муҳим барои рушди шарикии дуҷониба ва татбиқи ҳамаи созишномаҳое, ки дар сатҳи роҳбарони давлатҳо ба даст омадаанд, хизмат мекунад.

Сарвазири Ҷумҳурии Тоҷикистон  Қоҳир Расулзода изҳор намуд, ки ҷониби Тоҷикистон ба рушди муносибатҳои неки ҳамсоягӣ ва тақвияти ҳамкории мутақобилан судманд бо Ҷумҳурии Қирғизистон ҳавасманд мебошад  ва Шурои байниҳукуматӣ фароҳамсози шароит ва имкониятҳои зиёд барои пешбурди ташаббусҳои муштарак, густариши ҳамкории тиҷоратию  иқтисодӣ ва рушди ҳамкорӣ дар соҳаҳои энергетика, нақлиёт, кишоварзӣ ва дигар самтҳои афзалиятнок хоҳад буд.

Сарвазири Ҷумҳурии Тоҷикистон омодагии ҷониби Тоҷикистонро барои амалисозии  санадҳои ҳамкории дуҷониба  ва рушди минбаъдаи шарикӣ бо Ҷумҳурии Қирғизистон таъкид намуд.

Дар ҷаласаи Шурои байниҳукуматӣ ҷонибҳо нақшаҳоро барои таъмини иҷрои  мунтазами санадҳои  ҳамкорӣ  дар ҳама самтҳо, инчунин роҳҳои нави густариши минбаъдаи ҳамкориро  дар соҳаҳои гуногун муайян намуданд.

Ҷонибҳо изҳори итминон намуданд, ки ҷаласаи имрӯза барои фаъолгардонии ҳамкории минбаъда ва таҳким бахшидани он замина ва имконоти заруриро фароҳам месозад.

Пас аз анҷоми ҷаласа, Протоколи ҷаласаи якуми Шурои байниҳукуматии Ҷумҳурии Тоҷикистон ва Ҷумҳурии Қирғизистон, инчунин Ёддошти тафоҳум байни Палатаи савдо ва саноати Ҷумҳурии Тоҷикистон ва Маркази содиротии Қирғизистон оид ба рушд ва пешбурди содирот дар назди Вазорати иқтисод ва тиҷорати Ҷумҳурии Қирғизистон ба имзо расид.