«ЯК ҶАВОН – ЯК ДАРАХТ». Дар Душанбе иқдоми ҷумҳуриявии ниҳолшинонӣ баргузор гардид

ДУШАНБЕ, 21.02.2026 /АМИТ «Ховар»/. Имрӯз дар доираи Соли вусъат додани корҳои ободониву созандагӣ ва тақвияту таҳкими худшиносиву худогоҳии миллӣ дар Боғи Ғалаба иқдоми ҷумҳуриявии ниҳолшинонӣ таҳти унвони «Як ҷавон – як дарахт» баргузор гардид. Дар ин хусус ба АМИТ «Ховар» аз Кумитаи кор бо ҷавонон ва варзиши назди Ҳукумати Ҷумҳурии Тоҷикистон хабар доданд.

Иқдоми мазкур бо ташаббуси Кумитаи кор бо ҷавонон ва варзиши назди Ҳукумати Ҷумҳурии Тоҷикистон дар ҳамкорӣ бо Мақомоти иҷроияи ҳокимияти давлатии шаҳри Душанбе ва бо иштироки сохторҳои Кумита дар пойтахт гузаронида шуд.

Дар чорабинӣ роҳбарият ва кормандони дастгоҳи марказии Кумита, масъулини сохторҳои дахлдор дар шаҳри Душанбе, инчунин ҷавонон, донишҷӯён, хонандагон, варзишгарон ва фаъолони ҷомеа иштирок намуда, дар ҳудуди ҷудошудаи Боғи Ғалаба ниҳолҳо ва дарахтони ҳамешасабз шинониданд.

Ташаббуси мазкур ба таҳкими фарҳанги экологӣ, баланд бардоштани ҳисси масъулиятшиносӣ ва саҳмгузории ҷавонон дар ободонии Ватан равона гардида, рамзи таваҷҷуҳ ба ҳифзи муҳити зист ва эҳтиром ба арзишҳои миллӣ арзёбӣ мешавад.

Таъкид гардид, ки иқдоми «Як ҷавон – як дарахт» на танҳо маъракаи мавсимии ниҳолшинонӣ, балки ҳаракати умумиҷумҳуриявӣ дар роҳи бунёдкорӣ, созандагӣ ва таъмини рушди устувори кишвар мебошад. Баргузории он дар шаҳру ноҳияҳои ҷумҳурӣ бомаром идома дорад.

Масъулин таъкид карданд, ки ҷалби васеи ҷавонон ба чунин иқдомҳои созанда метавонад ба сарсабз гардондани кишвар, беҳтар шудани вазъи экологии шаҳрҳо ва деҳот, инчунин ташаккули ҷаҳонбинии ватандӯстонаи насли ҷавон мусоидат намояд.

АКС: Кумитаи кор бо ҷавонон ва варзиши назди Ҳукумати Ҷумҳурии Тоҷикистон