НАВРӮЗ — ВАСИЛАИ МУАССИРИ МУКОЛАМАИ ТАМАДДУНҲО. Таҳти ин унвон конфронси илмию амалӣ доир шуд

ДУШАНБЕ, 19.03.2026 /АМИТ «Ховар»/. Наврӯз на танҳо ҷашни миллию мардумӣ, балки падидаи муҳими тамаддунсоз буда, арзишҳои умумибашарӣ, аз ҷумла сулҳ, ваҳдат ва таҳаммулпазириро таҷассум менамояд. Чунин иброз гардид зимни конфронси илмию амалӣ, ки дар Маркази тадқиқоти стратегии назди Президенти Ҷумҳурии Тоҷикистон таҳти унвони «Наврӯз василаи муассири муколаммаи тамаддунҳо ва ташаккули хотираи таърихии ҷомеаи муосири Тоҷикистон» баргузор гардид.

Тавре ба АМИТ «Ховар» аз ин марказ хабар доданд, зимни конфронс иштирокчиён оид ба аҳамияти таърихию фарҳангии Наврӯз ва нақши он дар таҳкими худшиносии миллӣ мубодилаи афкор намуданд.

Иброз гардид, ки Наврӯз ҳамчун рамзи эҳё, покизагӣ ва оғози нав дар фарҳангу тамаддуни тоҷикон ҷойгоҳи хос дошта, имрӯз ба яке аз василаҳои муҳими таҳкими муколамаи тамаддунҳо табдил ёфтааст. Ин ҷашни миллӣ унсури муҳими худшиносии миллӣ ва омили муттаҳидкунандаи ҷомеа мебошад.

Таъкид шуд, ки ин ҷашн метавонад ҳамчун омили рушди сайёҳӣ, эҳёи ҳунарҳои мардумӣ ва густариши ҳамкории минтақавӣ хизмат намояд. Аз ин рӯ истифодаи оқилонаи мероси фарҳангии ниёгон, аз ҷумла суннатҳои наврӯзӣ, барои таҳкими пояҳои давлатдорӣ ва рушди устувори ҷомеа аҳамияти муҳим дорад.

АКС: Маркази тадқиқоти стратегии назди Президенти Ҷумҳурии Тоҷикистон