Дар Барселона имконоти сармоягузории Тоҷикистон муаррифӣ гардид

ДУШАНБЕ, 29.04.2026. /АМИТ «Ховар»/. Дар Барселона Форуми 10-уми шарикии давлат ва бахши хусусӣ баргузор  шуд, ки дар он   имконоти сармоягузории Тоҷикистон муаррифӣ гардид, иттилоъ медиҳад АМИТ «Ховар» бо истинод ба Кумитаи давлатии сармоягузорӣ ва идораи амволи давлатии Ҷумҳурии Тоҷикистон.

Форум аз ҷониби Комиссияи иқтисодии Созмони Милали Муттаҳид барои Аврупо (UNECE) ташкил карда шуда, дар он муовини раиси Кумитаи давлатии сармоягузорӣ ва идораи амволи давлатии Ҷумҳурии Тоҷикистон Муҳаммадзариф Шарифзода сухан намуд.

Форум намояндагони ҳукуматҳо, созмонҳои байналмилалӣ, муассисаҳои молиявӣ ва бахши хусусиро ба хотири баррасии масъалаҳои рушди шарикии давлат ва бахши хусусӣ, ҷалби сармоягузорӣ, татбиқи лоиҳаҳои инфрасохторӣ, ноил шудан ба Ҳадафҳои рушди устувор, истифодаи механизмҳои муосири маблағгузорӣ ва таҳкими ҳамкории байналмилалӣ ба ҳам овард.

Имсол мавзуи меҳварии форум «Ҷалби шарикиҳо: ташаккули шарикии давлат ва бахши хусусии устувор ва инфрасохтор барои ояндаи устувор» муайян гардид. Дар доираи он ҷаласаҳои пленарӣ баргузор шуда, коршиносон  муҳокимаронӣ намуданд, инчунин лоиҳаҳои муаррифӣ шуданд, ки ин ҳама ба ноил шудан ба Ҳадафҳои рушди устувор равона гардидааст.

Дар форум таваҷҷуҳи махсус ба масъалаҳои устувории иқлимии инфрасохтор, истифодаи абзорҳои инноватсионии молиявӣ, аз ҷумла вомбаргҳои «сабз» ва маблағгузории омехта, инчунин татбиқи технологияҳои рақамӣ ва зеҳни сунъӣ дар тамоми марҳилаҳои татбиқи лоиҳаҳои шарикии давлат ва бахши хусусӣ зоҳир гардид.

Зимни мулоқоту суҳбатҳо дар доираи форум оид ба имконоти сармоягузорӣ дар Тоҷикистон, ислоҳоти ҷорӣ дар самти беҳтарсозии муҳити сармоягузорӣ ва рушди механизми шарикии давлат ва бахши хусусӣ, татбиқи лоиҳаҳои афзалиятнок, бахусус дар соҳаҳои энергияи барқароршаванда, инфрасохтор ва хизматрасониҳои иҷтимоӣ маълумот дода шуд.

АКС: Кумитаи давлатии сармоягузорӣ ва идораи амволи давлатии Ҷумҳурии Тоҷикистон