Дар Москва ҷаласаи Шурои соҳибкории Русияву Тоҷикистон баргузор гардид

ДУШАНБЕ, 21.04.2026. /АМИТ «Ховар»/. 20 апрел дар шаҳри Москва ҷаласаи Шурои соҳибкории Русияву Тоҷикистон баргузор гардид. Дар кори он масъалаи ҳамкории иқтисодию тиҷоратӣ байни минтақаҳои ду давлат мавриди баррасӣ қарор дода шуд. Дар ин хусус аз хадамоти матбуоти Раиси вилояти Суғд ба АМИТ «Ховар» иттилоъ доданд.

Дар ҷаласа ҳамчунин намояндагони доираҳои соҳибкории ду давлат доир ба таҷрибаи ҳамкорӣ бо вилояти Суғд изҳори андеша карданд.

Иттилоъ дода шуд, ки дар доираи ҷаласаи Шуро вохӯрии  Раиси вилояти Суғд Раҷаб Аҳмадзода бо президенти Палатаи савдо ва саноати Федератсияи Русия Сергей Катирин доир шуд. Ҷонибҳо аз ҳамкории Тоҷикистону Русия изҳори қаноатмандӣ намуда, афзуданд, ки рушди устувори муносибатҳои дуҷониба самараи сиёсати оқилона ва дурандешонаи Президенти Ҷумҳурии Тоҷикистон муҳтарам Эмомалӣ Раҳмон ва Президенти Федератсияи Русия муҳтарам Владимир Путин мебошад.

Дар ҷараёнӣ вохӯрӣ иброз гардид, ки дар вилояти Суғд беш аз 80 ҳазор гектар боғ мавҷуд буда, дар вақти мавсим ҳамарӯза то 1000 тонна маҳсулоти содиротӣ ба бозорҳои Федератсияи Русия интиқол дода мешавад.

Дар вохӯрӣ имконияти сармоягузории вилояти Суғд низ муаррифӣ карда шуд. Дар ҳошияи муаррифии имконият барномаи фарҳангӣ низ пешкаш гардид.

АКС: Хадамоти матбуоти Раиси вилояти Суғд