Президенти Тоҷикистон аз афзоиши тӯфонҳои чанголуд дар минтақаи Осиёи Марказӣ изҳори нигаронӣ намуданд

ДУШАНБЕ, 23.04.2026. /АМИТ «Ховар»/. Президенти Ҷумҳурии Тоҷикистон муҳтарам Эмомалӣ Раҳмон зимни суханронӣ дар Саммити минтақавии экологӣ дар мавзуи «Диди муштарак барои ояндаи устувор», ки 22 апрел дар Остона оғоз гардид, аз афзоиши басомад ва давомнокии тӯфонҳои чанголуд дар минтақаи Осиёи Марказӣ, ки ба саломатии аҳолӣ ва муҳити зист таъсири манфӣ мерасонанд, изҳори нигаронӣ намуданд.

Сарвари давлат афзуданд, ки танҳо соли 2025 дар Тоҷикистон беш аз шаст тӯфони чанголуд ба қайд гирифта шуд, ки давомнокии умумии онҳо тақрибан ҳафт моҳро ташкил дод. Дар ҳамин ҳол, дар аввали солҳои навадуми асри гузашта басомади чунин зуҳуроти обу ҳаво танҳо ду ё се маротиба дар як сол буд.

Пешвои миллат иброз доштанд, ки Саммити минтақавии экологӣ дар Остона дар шароите баргузор мегардад, ки тағйирёбии иқлим, таназзули низомҳои экологӣ, норасоии захираҳои об ва офатҳои табиӣ ҳам барои минтақаи мо ва ҳам барои тамоми ҷаҳон ба мушкилоти ҷиддӣ табдил меёбанд. Бешубҳа, ин вазъият аз мо тадбирҳои муштараку ҳамоҳангро тақозо менамояд.

Бо дахли захираҳои обии Тоҷикистон Президенти мамлакат таъкид намуданд, ки дар ҳудуди Тоҷикистон то 60 фоизи захираҳои обии Осиёи Марказӣ ташаккул меёбанд. Ин нақши муҳими низоми экологии кӯҳии Тоҷикистонро дар таъмини обрасонӣ ва рушди устувор дар минтақа собит менамояд. Дар ин замина, обшавии босуръати пиряхҳо ва кам шудани захираҳои барф боиси нигаронии амиқ мегардад. Гуфта шуд, ки аз чордаҳ ҳазор пиряхи Тоҷикистон беш аз 1300 адади онҳо аллакай пурра об шудаанд.

«Раванди босуръати обшавии пиряхҳо дар саросари ҷаҳон тамоюли афзоиш дошта, ба вайроншавии тавозуни об, ба вуҷуд омадани таҳдидҳо ба муҳити зист ва зиёд гардидани хавфи офатҳои табиии вобаста ба об оварда мерасонад»,-изҳор доштанд Президенти Тоҷикистон.

АКС: АМИТ «Ховар»