Дар КВД «Роҳи оҳани Тоҷикистон» ба муносибати Рӯзи Ваҳдати миллӣ ва қабули ташаббуси нави ҷаҳонии Тоҷикистон ҳамоиш доир гардид

ДУШАНБЕ, 26.06.2026 /АМИТ «Ховар»/. Дар Корхонаи воҳиди давлатии «Роҳи оҳани Тоҷикистон» ба муносибати 29-солагии Рӯзи Ваҳдати миллӣ ва қабули ташаббуси нави Тоҷикистон таҳти унвони «Даҳсолаи байналмилалӣ оид ба таҳкими сулҳ барои наслҳои оянда, солҳои 2027 – 2036» аз ҷониби Маҷмаи Умумии Созмони Милали Муттаҳид ҳамоиши тантанавӣ баргузор гардид.

Тавре ба АМИТ «Ховар» аз Корхонаи воҳиди давлатии «Роҳи оҳани Тоҷикистон» хабар доданд, иштирокдорони чорабинӣ нақши таърихии Президенти Ҷумҳурии Тоҷикистон, Пешвои миллат  муҳтарам Эмомалӣ Раҳмонро дар барқарорсозии сулҳу субот, таҳкими ваҳдати миллӣ, рушди давлатдории навини тоҷикон ва пешрафти устувори мамлакат таъкид намуданд.

Иштирокдорон инчунин оид ба аҳамияти сулҳу ваҳдати миллӣ ҳамчун пояи асосии рушди иқтисодиву иҷтимоӣ, таҳкими амният, суботи сиёсӣ ва татбиқи ҳадафҳои стратегии Ҷумҳурии Тоҷикистон ибрози назар карданд.

Таъкид гардид, ки маҳз ба шарофати сиёсати сулҳпарваронаи Пешвои миллат имрӯз Тоҷикистон ҳамчун давлати ташаббускор дар арсаи байналмилалӣ эътироф гардида, пешниҳодҳои он вобаста ба масъалаҳои глобалӣ аз ҷониби ҷомеаи ҷаҳонӣ пайваста дастгирӣ меёбанд.

Дар ин замина иштирокдорон аз қабули ташаббуси нави Ҷумҳурии Тоҷикистон аз ҷониби Маҷмаи умумии Созмони Милали Муттаҳид таҳти унвони «Даҳсолаи байналмилалӣ оид ба таҳкими сулҳ барои наслҳои оянда, солҳои 2027–2036» истиқбол намуда, онро идомаи мантиқии сиёсати сулҳҷӯёна ва башардӯстонаи Тоҷикистон арзёбӣ карданд.

Тазаккур дода шуд, ки қабули ин қатънома бори дигар нуфузи байналмилалии Тоҷикистон ва эътирофи нақши фаъоли он дар пешбурди рӯзномаи ҷаҳонии сулҳ, таҳкими ҳамкорӣ ва муколамаи созандаро собит намуда, барои густариши талошҳои байналмилалӣ ҷиҳати тарбияи фарҳанги сулҳ ва ҳамзистии осоишта байни наслҳои оянда заминаи мусоид фароҳам меорад.

Дар фарҷоми чорабинӣ изҳор гардид, ки ҳифзу таҳкими ваҳдати миллӣ, арҷгузорӣ ба арзишҳои сулҳ ва саҳмгузорӣ дар пешрафти давлат вазифаи муқаддаси ҳар як шаҳрванди Тоҷикистон буда, кормандони соҳаи роҳи оҳан низ дар татбиқи сиёсати созандаи давлату Ҳукумат ва рушди устувори мамлакат саҳми арзандаи худро мегузоранд.

АКС: Корхонаи воҳиди давлатии «Роҳи оҳани Тоҷикистон»