Дар Теҳрон китоби «Каманди зулф»-и Зулфия Атоӣ рӯнамоӣ гардид

ДУШАНБЕ, 11.06.2026 /АМИТ «Ховар»/. 9 июн дар Муассисаи фарҳангии Созмони ҳамкории иқтисодӣ дар якҷоягӣ  бо Сафорати Ҷумҳурии Тоҷикистон дар Ҷумҳурии Исломии Эрон маросими рӯнамоии китоби «Каманди зулф» — баргузидаи ашъори Шоири халқии Тоҷикистон Зулфия Атоӣ бо иштироки аҳли адабу ҳунар ва дипломатҳои муқими Теҳрон баргузор гардид.

Тавре ба АМИТ «Ховар» аз Сафорати Ҷумҳурии Тоҷикистон дар Ҷумҳурии Исломии Эрон хабар доданд, дар  чорабинӣ изҳор гардид, ки нашр ва рӯнамоии китоби  «Каманди зулф»-и  Шоири халқии Тоҷикистон Зулфия Атоӣ бо хатти форсӣ бо дастгирии Муассисаи фарҳангии Созмони ҳамкории иқтисодӣ дар таҳкими робитаҳои адабӣ ва фарҳангии давлатҳои минтақа ва муаррифии мероси адабии Тоҷикистон ба доираи васеи хонандагони форсизабон нақши муҳим хоҳад гузошт.

Сафири Фавқулода ва Мухтори Ҷумҳурии Тоҷикистон дар Ҷумҳурии Исломии Эрон Низомиддин Зоҳидӣ таъкид намуд, ки Зулфия Атоӣ беш аз чаҳор даҳсола аст, ки дар саҳнаи шеъру адаб ва фарҳанги  Тоҷикистон фаъолият дошта,  бо эҷоди осори дилписанд дар рушди адабиёти муосири тоҷик саҳми худро гузоштааст. Ашъор ва осори адабии Зулфия Атоӣ  гувоҳ бар он аст, ки ӯ бо сухани пурмуҳаббат, эҳсоси нозуки занона ва қалби саршор аз меҳру садоқат дар адабиёти тоҷик ҷойгоҳи вижаи худро пайдо кардааст.

Сафири Тоҷикистон фаъолияти эҷодиву адабии Зулфия Атоӣ ва бо унвони олии «Шоири халқии Тоҷикистон»  қадрдонӣ шудани ӯро,  намунаи боризи татбиқи сиёсати фарҳангӣ ва ибтикори Президенти Ҷумҳурии Тоҷикистон муҳтарам Эмомалӣ Раҳмон доир ба баланд бардоштани мақоми зан дар ҷомеаи Тоҷикистон арзёбӣ намуд.

Дар идомаи ҳамоиш суҳбати видеоии донишманди тоҷик Алӣ Муҳаммадии Хуросонӣ, ки ба китоб пешгуфтор навиштааст, пахш гардид. Муҳаққиқ ба баррасии вижагиҳои шеъри Зулфия Атоӣ пардохта, аз ҷумла таъкид кард, ки  дар эҷодиёти шоир  омезиши равиши шеъри муосири ҷаҳон бо суннатҳои ғании шеъри тоҷикӣ-форсӣ  ба таври возеҳ мушоҳида мешавад.

Ҳамчунин доктор Маҷид Асадӣ, мудири интишороти «Нашри нағз» ва тоҷикпажуҳи эронӣ андешаҳои худро оид ба китоб баён карда, Зулфия Атоиро аз ҷумлаи шоирони баркамоли Тоҷикистон арзёбӣ намуд, ки тавонистааст дарду ормонҳои инсонро бо ҳунари баланд ва таъсиргузор инъикос намояд.

Ёдовар мешавем, ки китоби «Каманди зулф» чанде пеш бо пешниҳоди Вазорати фарҳанги Ҷумҳурии Тоҷикистон ва бо дастгирии Муассисаи фарҳангии Созмони ҳамкории иқтисодӣ дар интишороти «Орван»-и шаҳри Теҳрон бо хатти форсӣ, дар ҳаҷми 480 саҳифа ва бо теъдоди 500 нусха ба нашр расидааст.

АКС: Сафорати Ҷумҳурии Тоҷикистон дар Ҷумҳурии Исломии Эрон