Густариши ҳамкории Тоҷикистон ва Озарбойҷон дар самти геодезия баррасӣ шуд

ДУШАНБЕ, 11.06.2026 /АМИТ «Ховар»/. 10 июн дар шаҳри Душанбе мулоқоти Раиси Кумитаи давлатии идораи замин ва геодезии Ҷумҳурии Тоҷикистон Ориф Хоҷазода бо ҳайати Ҷумҳурии Озарбойҷон, таҳти роҳбарии муовини сардори Хадамоти давлатии масъалаҳои амволи назди Вазорати иқтисод Рустам Шаҳбозов баргузор шуд, ки дар он ҳамкории Тоҷикистон ва Озарбойҷон дар самти рушди геодезия баррасӣ гардид.

Тавре АМИТ «Ховар» бо истинод ба Кумитаи давлатии идораи замин ва геодезӣ хабар медиҳад, дар мулоқот ҷонибҳо мушоҳидаи фосилавии замин, табодули таҷриба ва масъалҳои марбут ба соҳаро муҳокима намуданд.

Ориф Хоҷазода иброз дошт, ки мулоқоти имрӯза имконияти хуб барои шиносоӣ аз ҷараёни истеҳсолӣ, системаҳои иттилоотӣ, таҷҳизоти геодезӣ ва таҷрибаи корхонаву муассисаҳои системаи Кумитаи давлатии идораи замин ва геодезӣ хоҳад буд.

Дар баробари ин пешниҳод гардид, ки ҷонибҳо дар доираи муқаррароти Созишнома байни Ҳукумати Тоҷикистон ва Ҳукумати Озарбойҷон оид ба ҳамкорӣ дар соҳаи геодезия, харитасозӣ, кадастр ва мушоҳидаи фосилавии Замин ва маълумотҳои ҷуғрофӣ метавонанд, ки вобаста ба рақамикунонии кадастри замин ва бақайдгирии амволи ғайриманқул, таъсис ва рушди инфрасохтори миллии маълумотҳои фазоӣ, идоракунии захираҳои замин, мубодилаи таҷриба дар соҳаи хизматрасониҳои давлатии электронӣ, омода намудан ва такмили ихтисоси мутахассисони соҳа, баргузор намудани машваратҳои муштарак, барномаҳои омӯзишӣ ва лоиҳаҳои озмоишӣ ҳамкориро тақвият диҳанд.

Муовини сардори Хадамоти давлатии масъалаҳои амволи назди Вазорати иқтисоди Ҷумҳурии Озарбойҷон Рустам Шаҳбозов изҳори омодагӣ намуд, ки дар доираи татбиқи Созишномаи имзошуда, барои рушду тавсеаи ҳамкории мутақобилан судманд тадбирҳои зарурӣ ба роҳ монда хоҳад шуд.

Инчунин ҳайати Ҷумҳурии Озарбойҷон бо фаъолияти корхонаву муассисаҳои системаи Кумитаи давлатӣ ва мавзеъҳои таърихиву сайёҳии Тоҷикистон шинос шуданд.

АКС: Кумитаи давлатии идораи замин ва геодезии Ҷумҳурии Тоҷикистон