Олимони Ҳиндустон дар Осорхонаи миллии Тоҷикистон бо ёдгориҳои беназир ва бозёфтҳои нодири бостоншиносӣ шинос шуданд

ДУШАНБЕ, 10.09.2026 /АМИТ «Ховар»/. Олимони Ҳиндустон таҳти роҳбарии профессор Рамакант Двидевӣ-роҳбари Маркази таҳқиқоти кишварҳои Иттиҳоди Давлатҳои Мустақили Институти MERI – (Marine Engineering And Research Institute) ва директори Бунёди Ҳиндустон-Осиёи Марказӣ (ICAF — Indian-Central Asia Foundation), ки бо сафари омӯзишӣ дар Тоҷикистон қарор доранд, зимни тамошои Осорхонаи миллии Тоҷикистон бо таъриху тамаддун, фарҳанги бостонӣ ва мероси таърихию фарҳангии халқи тоҷик шинос шуданд.

АМИТ «Ховар» бо истинод ба Осорхонаи миллии Тоҷикистон иттилоъ медиҳад, ки меҳмонон зимни сайри осорхонавӣ бо таърихи бисёрасраи халқи тоҷик, марҳилаҳои муҳимми ташаккули давлатдорӣ, фарҳанг ва тамаддуни тоҷикон, инчунин бозёфтҳои нодири бостоншиносӣ ва намунаҳои арзишманди мероси моддию маънавии Тоҷикистон шинос шуданд.

Зимни боздид ба меҳмонон ёдгориҳои беназир ва бозёфтҳои нодири бостоншиносӣ, аз ҷумла осори марбут ба ёдгориҳои Саразм, Панҷакенти қадим, Тахти Сангин, Аҷинатеппа ва дигар мавзеъҳои таърихию бостоншиносии тоҷикон муаррифӣ шуданд. Ҳамчунин меҳмонон бо осори нодири санъати тасвирӣ, санъати амалӣ ва дигар бахшҳои мероси фарҳангии халқи тоҷик аз наздик шинос шуданд.

Боздиди мазкур дар доираи таҳкими робитаҳои дӯстӣ ва ҳамкории фарҳангию илмӣ байни Ҷумҳурии Тоҷикистон ва Ҷумҳурии Ҳиндустон доир шуда, барои шиносоии амиқтари олимону мутахассисони Ҳиндустон бо таъриху тамаддуни бостонӣ ва мероси ғании фарҳангии Тоҷикистон заминаи мусоид фароҳам овард.

АКС: Осорхонаи миллии Тоҷикистон