Р. Ҳакимзода: «Шумораи пасандозгузорони «Амонатбонк» 303 ҳазор нафар зиёд шуд»
Душанбе, 20.0.1.2015. (АМИТ «Ховар»).-«Соли 2015 шумораи пасандозгузорон нисбат ба соли 2014 303 ҳазор нафар зиёд шуда, ба зиёда аз 1 млн. нафар расидааст. Бақияи пасандозҳои шахсони ҳуқуқӣ ва воқеии бонк дар соли ҳисоботӣ 1,8 млрд. сомониро ташкил намуд, ки нисбат ба соли 2014 47% афзоиш ёфтааст». Ин нуктаро Ҳакимзода Руҳулло, раиси раёсати БДА «Амонатбонк» дирӯз зимни нишасти матбуотӣ иброз намуд.
Тибқи иттилои раиси раёсати БДА «Амонатбонк» ҳиссаи пасандозҳои аҳолӣ дар бонк 61,5%-и ҳамаи пасандозҳои ҷалбгардидаро ташкил менамояд. Бақияи пасандозҳои муҳлатнок нисбат ба соли 2014 213 млн. сомонӣ, ё 35% зиёд шуда, ба 815,9 млн.сомонӣ расонида шудааст.
Фоизҳои ба аҳолӣ пардохташуда дар соли 2015 маблағи 101 млн. сомониро ташкил менамоянд, ки нисбат ба соли 2014 30% зиёд мебошанд. Ин, албатта, ба сатҳи даромади аҳолӣ ва ҳамзамон баланд гардидани сатҳи некуаҳволии онҳо, ки умдатарин ҳадафи бонк мебошад, мусоидат хоҳад кард.