Дар Душанбе имкониятҳои иқтисодию тиҷоратии Тоҷикистону Ӯзбекистон муаррифӣ шуданд

Апрел 19, 2017 16:09

Хабарҳои мавзӯъ

Бизнес Форум (2)

ДУШАНБЕ, 19.04.2017/АМИТ «Ховар»/. Доираҳои соҳибкорию тиҷоратии Тоҷикистону Ӯзбекистон хостори ба роҳ мондан ва тавсеаи ҳамкории мутақобилан судманд дар бахши иқтисоду тиҷоратанд. Дар ин росто имрӯз дар Душанбе ҳамоиши соҳибкорони Тоҷикистону Ӯзбекистон доир шуд, ки дар он имконият ва иқтидори иқтисодию тиҷоратии ду кишвари ҳамҷавор муаррифӣ гардид.
«Ҳадаф аз баргузории ҳамоиши доираҳои тиҷоратии Тоҷикистону Ӯзбекистон густариши равобити иқтисодию тиҷоратӣ, ҷалби сармоя, таъсиси корхонаҳои муштарак, пайдо намудани шарикони тиҷоратӣ, афзун гардонидани ҳаҷми мубодилаи мол байни ду кишвар мебошад»,-гуфт дар маросими ифтитоҳи ҳамоиши доираҳои тиҷоратии ду кишвари ҳамсоя Шариф Саид, раиси Палатаи савдо ва саноати Ҷумҳурии Тоҷикистон. Ҳамзамон дар назди доираҳои тиҷоратии Тоҷикистону Ӯзбекистон Файзиддин Қаҳҳорзода, раиси Кумитаи давлатии сармоягузорӣ ва идораи амволи давлатии Ҷумҳурии Тоҷикистон, Назира Дадахонова, муовини раиси Палатаи савдо ва саноати Ҷумҳурии Ӯзбекистон ва дигар намояндагони доираҳои тиҷоратии ҳар ду кишвар доир ба зарфият ва иқтидори иқтисодии Тоҷикистону Ӯзбекистон сухан карданд.
Таъкид гардид, ки Тоҷикистону Ӯзбекистонро аз қадимулайём анъанаҳои неки дӯстӣ ва ҳусни ҳамҷаворӣ бо ҳам мепайванданд ва робитаҳои гуногунсоҳаи ду кишвар дар асоси эътимод ва эҳтироми мутақобила беш аз пеш густариш меёбад. Баргузории ҳамоиши доираҳои тиҷоратии ду кишвар дар Душанбе худ шаҳодатест аз тавсеаи равобити ҳасанаи ду кишвар дар бахши иқтисоду тиҷорат. Мубодилаи мол дар соли 2016 байни Тоҷикистону Ӯзбекистон дар қиёс ба соли 2015 5, 7 баробар афзуда, 69,2 миллион долларро ташкил дод, ки ин омор дар зарфи солҳои охир нишондоди баланд арзёбӣ мегардад. Дар соли сипаригардида ҳаҷми умумии гардиши мол байни ду кишвари ҳамсоя шаш баробар афзуда, наздик ба 70 миллион доллар буд, ки аз он наздики 36 миллион доллар ба содироти мол аз Тоҷикистон ба Ӯзбекистон ва 34 миллион доллар воридоти маҳсулоти Ӯзбекистон ба Тоҷикистон аст.
Зикр шуд, ки имрӯз Тоҷикистону Ӯзбекистон дорои имконияту шароити мусоид бо назардошти мавқеъияти ҷуғрофианд, зеро яке аз омилҳои асосии рушди иқтисоду тиҷорат ба ҳаммарз будани ду кишвар иртибот дошта, он ба табодули мол, инчунин коҳиш додани нархи молу маҳсулот дар бозорҳо мусоидат менамояд. Таъкид шуд, ки байни ду давлат имкониятҳои бузурги истифоданашуда хеле зиёданд ва имрӯз вақти он расидааст, ки аз он ба таври васеъ ва самаранок истифода шавад. Ин раванд ба баланд гардидани ҳаҷми гардиши мол байни ду кишвар, таъсиси корхонаҳои муштараки саноатӣ, дар заминаи он фароҳам оврадани ҷойҳои нави корӣ ва дар маҷмӯъ баланд бардоштани сатҳи иқтисодӣ ва беҳдошти вазъи иҷтимоии мардумони на танҳо ду кишвар, балки кишварҳои ҳавзаи Осиёи Марказӣ мусоидат хохад кард. Дар ин росто зикр шуд, ки ҳамгироии минтақавӣ бо назардошти тақвияти равобити иқтисодию тиҷоратӣ имкониятҳои наву фарохро дар самти тавсеаи ҳамкории наздисарҳадӣ, хусусан таъсиси бозорҳои наздимарзӣ, афзоиши ҳаҷми интиқоли молу маҳсулот ва таҳкими дӯстиву ҳусни ҳамҷаворӣ байни мардумони ҳар ду кишвар фароҳам меорад.
Дар ҳамоиши соҳибкорони Тоҷикистону Ӯзбекистон, роҳбарони корхонаю ширкатҳои истеҳсолии «Узавтосаноат», «Тоҷинвест», «Узкимёсаноат», «Ноқили ТАЛКО», «Фароз», «Амирӣ», «Ваҳдат», «Узбекенгилсаноат», «Узфармсаноат», «Узбекчарпайафзалӣ» ва дигар соҳибкорони тоҷику ӯзбек иқтидори истеҳсолию содиротии корхонаю ширкатҳо ва минтақаҳои озоди иқтисодӣ, инчунин вазъ ва низоми сармоягузориро дар ҳар ду кишвар муаррифӣ намуда, омодагии худро бобати ба роҳ мондан ва тавсеаи ҳамкорӣ ҷиҳати рушди иқтисоду тиҷорат байни ҳар ду кишвар баён доштанд. Таъкид шуд, ки Ӯзбекистон алҳол дар радифи панҷ кишвари дар ҳоли рушдбудаи ҷаҳон қарор дошта, беш аз 9,7 ҳазор корхонаҳои гуногуни истеҳсолӣ фаъолияти самарабахш доранд. Хусусан дар ин кишвар саноати мошинсозӣ, технология, истеҳсоли дастгоҳҳои барқӣ, саноати сабук, бахусус нассоҷӣ, кишоварзӣ, масолеҳи сохтмонӣ, фармасевтӣ рушд кардаанд.
Бояд тазаккур дод, ки баргузории ҳамоиши доираҳои тиҷоратии Тоҷикистону Ӯзбекистон ва намоишгоҳи молҳои беш аз 160 ширкати истеҳсолии ин кишвар дар Маҷмааи савдои «Пойтахт-90» қадами муассирест дар тақвияти равобити дуҷонибаи судманд ва марҳилаи навест дар самти тавсеаи равобити иқтисодию тиҷоратии Тоҷикистону Ӯзбекистон. Дар доираи ҳамоиши иқтисодӣ мулоқоти мустақим ва дуҷонибаи соҳибкорони Тоҷикистону Ӯзбекистон доир гардида, дар он масоли марбут ба роҳ мондан ва дурнамои тавсеаи робитаҳои иқтисодии ду кишвар баррасӣ шуданд. Инчунин байни бархе аз ширкату корхонаҳои истеҳсолии ҳар ду кишвар санадҳои ҳамкорӣ ба имзо расиданд.

Апрел 19, 2017 16:09

Хабарҳои дигари ин бахш

????????????????????????????????????Ҳамкории Бонки миллии Тоҷикистон ва Иттиҳод оид ба дастрасии молиявӣ (AFI)
Форуми Сохбкорони КАЗ+ТОЧ (14)Қазоқистон баъд аз Россия ва Чин дар рушди иқтисоди Тоҷикистон ҷойгоҳи арзишманд дорад
Форуми Сохбкорони КАЗ+ТОЧ (5)Ба имзо расидани қарордод ба маблағи $ 3 миллион байни «Amitech Astana» ва «ПластСервис»-и Тоҷикистон
Доллар-0Шарҳи навбатии Бонки миллии Тоҷикистон оид ба вазъи қурби пули миллӣ ва бозори дохилии асъор
Встреча делегации Республики Таджикистан с Парламентским заместителем министра экономики, торговли и промышленности Японии (2)Баррасии истихроҷ ва коркарди маъданҳои кӯҳӣ миёни намояндагони Тоҷикистону Япония
DSC_0104Нахустин намоишгоҳи миллии молҳои Ӯзбекистон дар Душанбе ифтитоҳ гардид
Х ЗарифиСафорати Ҷумҳурии Тоҷикистон дар Токио соҳибкорони Японияро ба ҳамкорӣ даъват намуд
Конфронси Байналмилали (1)Рушди иҷтимоию иқтисодии Тоҷикистон дар шароити ҷаҳонишавӣ
мусохиба-зафарчон Бурхонзода Вазорати рушди иктисодВазъи имрӯзаи бозори дохилии асъор: оё омилҳои иқтисодие ҳастанд, ки қурби асъори миллиро мӯътадил нигоҳ доранд?
DSC_0433+Дар Душанбе Форуми байналмилалии соҳибкорони ҷавон оғоз гардид
корхонаи саноатиДар Суғд ба маблағи зиёда аз 2 млрд сомонӣ маҳсулоти саноатӣ истеҳсол шуд
БМШАРҲИ БОНКИ МИЛЛӢ ОИД БА ВАЗЪИ ИМРӮЗАИ БОЗОРИ ДОХИЛИИ АСЪОР: ҳолати бозори дохилӣ зери назорат аст ва ба эътидол оварда мешавад