Акбаралӣ Саттор-шахсияти ватанпарваре, ки мардумро рўзномахон кард

Душанбе, 16.01.2016. (АМИТ «Ховар»).- Ба пешвози Анҷумани XIV-уми Иттифоқи журналистони Тоҷикистон, ки ин лаҳзаҳо дар маҷлисгоҳи «Шарқи Озод» ҷараён дорад, нашриёти «Шарқи Озод» китоби «Акбари бузург»- маҷмўи мақолаву ёддоштҳоро бахшида ба хотираи равоншод Акбаралӣ Саттор, раиси пешинаи Иттифоқи журналистон аз чоп баровард.
Акбаралӣ Саттор на танҳо раиси ИЖТ, балки ҳамдаму ҳамроз, мушовиру мададрасон, устоди меҳрубони аксари журналистони ҷавони кишвар, сухангустар, маҳфилоро, Ватанпарвар ва Ватандўст буд.
Аксари журналистон Акбаралӣ Сатторро ҳамчун роҳбалад, идеяофар ва мушкилосонкун ба ёд меоранд.
Бузургтарин хизмати Акбаралӣ дар 23 соли соҳобистиқлолии кишвар он аст, ки дар замони пас аз нобасомониҳо мардумро рўзномахон кард. Акбаралӣ барои ҷамъияти ташнаи маънавиёт рўзнома пешниҳод намуд, то ин ки мардум иштиҳои хонданро пайдо намояд.
Афсўс, сад афсўс, ки Акбаралӣ Саттор-марди хирад, марди Ватан, марди сухан, марди заковату фаросат садҳо нақшаву ниятҳои созандаи журналистиро бо худ бурд.
Зиҳӣ миллате, ки чунин фарзанди оқилу фозил ва ватанпарвар дорад!
Дар табъу нашри ин китоб муҳаррири масъул Умари Шерхон саҳми калон гузоштааст.
Китоб бо дастгирии директори нашриёти «Шарқи Озод» Ёқубҷон Исмоилзода ба чоп расид.