Дар ДДТТ ҳолати корупсионӣ ба қадри имкон аз байн бурда шуд

Душанбе, 27.01.2015. (АМИТ «Ховар»).-«Вобаста ба бартараф кардани ҳолатҳои коррупсионӣ дар Донишгоҳи давлатии тиббӣ корҳои зиёде ба анҷом расонида шуданд. Мо қабл аз фаъол гаштани Маркази милии тестӣ,  аз соли 2007 маркази ягонаи тестиро дар донишгоҳ таъсис дода  будем. Донишҷӯён ҳамаи имтиҳонҳоро дар ҳамин ҷо месупориданд ва ин иқдом пеши роҳи  ришваситониро аз байн бурд». Дар ин бора дирӯз зимни нишасти матбуотӣ ректори Донишгоҳи давлатии тиббии кишвар Убайдулло Қурбон иброз дошт.

Бино ба гуфтаи ректор имрӯз дар донишгоҳ масъалаи  ришваситонӣ  хеле кам гаштааст. “Он ҳарчанд пурра набошад ҳам, ба қадри имкон  аз байн бурда шуд. Мо  сандуқҳои шикоятӣ ва почтаи электронии ректорро фаъол кардаем ва аз тариқи он донишҷӯёну хоҳишмандон метавонанд бевосита ба мо муроҷиат кунанд”,-илова намуд ректор.

Убайдулло Қурбон афзуд, ки пас аз ба кор шуруъ кардани Маркази милии тестӣ кори онҳо низ осон шудаасту овозаҳо дар мавриди гирифтани пора ҳангоми дохилшавӣ аз байн рафтааст.