Хатлон: Баргузории ҷаласаи Шӯрои кор бо ҷавонони назди раиси вилоят ва даъвати муттаҳидӣ аз насли ояндасоз

Қурғонтеппа, 19.10.2016 /АМИТ «Ховар»/. Имрӯз, 19 октябр, дар толори Донишгоҳи давлатии шаҳри Қӯрғонтеппа ба номи Носири Хусрав ҷаласаи якуми Шӯрои кор бо ҷавонон дар назди раиси вилояти Хатлон бо иштироки раисон ва муовинони раисони шаҳру ноҳияҳои вилоят, мудирони бахши ҷавонон, варзиш ва сайёҳӣ ва ҷавонони фаъоли шаҳру ноҳияҳо баргузор гардид.
Дар кори ҷаласа масъалаи саҳми ҷавонони вилоят дар ҳаёти сиёсию иҷтимоӣ, иқтисодӣ ва фарҳангии Тоҷикистон дар даврони соҳибистиқлолии кишвар, дастовардҳо, мушкилот ва дурнамо баррасӣ гардиданд.
Дар ҷаласаи Шӯро раиси вилояти Хатлон саҳми ҷавононро дар пешрафти ҷомеаи имрӯза муҳим арзёбӣ намуда, онҳоро ба созандагию бунёдкорӣ, муттаҳидӣ дар атрофи сиёсати пешгирифтаи Сарвари давлат, ки дар симои ҷавонони имрӯза насли ояндасози миллатро мебинад, даъват кард.