«Сарбозони бесилоҳ» соҳиби ҷоизаи «Беҳтарин филм» дар Аввалин Фестивали телевизионии филмҳои мустанад «СИМО» гардид

ДУШАНБЕ, 06.11.2017. /АМИТ «Ховар»/.  Филми «Сарбозони бесилоҳ» сазовори ҷоизаи  «Беҳтарин филм» дар Аввалин Фестивали телевизионии филмҳои мустанад «СИМО» гардид, ки онро муовинони раиси Кумитаи телевизион ва радиои назди Ҳукумати Ҷумҳурии Тоҷикистон Маҳмадшариф Бобошоҳзода ва Назира Амирбекзода, ҳамчунин директори телевизиони «Синамо» Набӣ Набизода дар маросими тантанавӣ ба Сайёд Муҳаммадов супориданд.

Тавре қаблан иттилоъ дода будем, Муассисаи давлатии телевизиони «Синамо» шоми дирӯз дар шаҳри Душанбе маросими ҷоизасупории Аввалин Фестивали телевизионии филмҳои мустанад «СИМО»-ро доир намуд.

Ҳамзамон дар маросими тантанавӣ ба 15 нафар собиқадорони телевизион ва синамои тоҷик дипломҳои махсуси фестивал ва туҳфаҳои хотиравӣ супорида шуд. Сипас, аз ҷониби муовини якуми Вазири фарҳанги Ҷумҳурии Тоҷикистон Ибодулло Машраб ба намояндагони шабакаҳои телевизионӣ ва роҳбарияти «Кохи Наврӯз» барои саҳмгузорӣ ва иштироки фаъолона «Дипломи махсуси  Фестивал» тақдим гардид.

Тибқи номинатсияи Фестивал ба наворбардори шинохта Георгий Дзалаев ва коргардони маъруф Лилиана Налоева ҷоизаҳои «Барои хизмати шоиста»-ро муовини раиси Кумитаи телевизион ва радио Назира Амирбекзода ва раиси Иттифоқи журналистон, директори Академияи ВАО Зинатуллоҳи Исмоил супориданд. Ба ҷоизаи «Таваҷҷуҳи тамошобин» коргардон Абдулҳай Зокиров барои филми «Куҳандиёр» сазовор дониста шуд ва ҷоиза аз тарафи раиси Иттифоқи композиторон Хуршед Низомов тақдим гардид. Аъзои ҳакамон беҳтарин филм бахшида ба Соли ҷавонон филми коргардон Далери Имомалӣ  «Соҳибватан»-ро муайян карданд, ки ҷоизаро раиси Кумитаи ҷавонон ва варзиши назди Ҳукумати Ҷумҳурии Тоҷикистон Аҳтам Абдуллозода супорид.

Барандаи «Ҷоизаи махсуси ҳакамон» коргардон Файзулло Файз бо филми «Синамои тоҷик» дониста шуда, ҷоиза аз тарафи раиси Иттифоқи синамогарон Сафар Ҳақдод тақдим гардид. Филми коргардон Озод Маликов бо номи «Кавикас» барандаи ҷоизаи «Беҳтарин бозёфти эҷодӣ» шуд ва ҷоизаро директори Киностудияи давлатии «Тоҷикфилм» Носир Раҳмон тақдим кард. Ҷоизаи «Беҳтарин консепсия дар филми мустанад»-ро филми коргардон Сафарбеки Солеҳ «Комил» соҳиб шуд ва ҷоизаро муовини аввали раиси Иттифоқи нависандагон Ато Мирхоҷа супорид. Аъзои ҳакамон ба ҷоизаи «Беҳтарин наворбардор» наворбардори филми «Духтари Сайҳун» Наврӯз Саидовро лоиқ донистанд ва ҷоизаро наворбардори шинохта Заур Дахте тақдим кард. Ҷоизаи «Беҳтарин коргардонро» коргардони шинохта Рустам Шоазимов дар филми «Парвози парвона» соҳиб шуд ва ҷоиза аз тарафи Ҳунарманди халқии Тоҷикистон Убайдулло Раҷабов супорида шуд.

Дар охир санъаткорон бо таронаву сурудҳои дилнишин ба  ҷашнвора шаҳомати дигар бахшиданд.