Дар шаҳри Бишкек масъалаи панҷ макони махсуси ҳифзшавандаи мероси табиии Тоҷикистон баррасӣ гардид

ДУШАНБЕ, 25.06.2018. /АМИТ «Ховар»/. Дар шаҳри Бишкек зимни як семинар масъалаҳои панҷ макони махсуси ҳифзшавандаи мероси табиии Тоҷикистон, ки ба Рӯйхати пешакии ЮНЕСКО соли 2006 ворид шудаанд, баррасӣ гардиданд.

Тавре аз маркази матбуоти Вазорати фарҳанги Ҷумҳурии Тоҷикистон ба АМИТ «Ховар» хабар доданд, 19-20 июни соли равон дар шаҳри Бишкеки Ҷумҳурии Қирғизистон семинари машваратии минтақавӣ дар мавзӯи «Объектҳои эҳтимолии Осиёи Марказӣ ҳамчун номинатсия ба Феҳристи умумиҷаҳонӣ» баргузор гардид.

Дар он намояндагони комиссияҳои миллии ЮНЕСКО, созмонҳои байналмилалӣ, пажӯҳишгоҳҳои илмӣ-тадқиқотӣ, академияҳои илмӣ ва ҷомеаи шаҳрвандӣ аз панҷ давлати Осиёи Марказӣ: Қазоқистон, Қирғизистон, Тоҷикистон, Ӯзбекистон ва Туркманистон даъват шуда буданд. Аз Тоҷикистон як гурӯҳ бо роҳбарии муовини Вазири фарҳанги Ҷумҳурии Тоҷикистон Зевар Давлатзода иштирок намуд.

Зикр гардид, ки азбаски аз давраи ворид намудани онҳо ба Рӯйхати қаблии ЮНЕСКО дувоздаҳ сол гузаштааст, бояд маводи пажӯҳишӣ аз нав дида баромада шуда, ҳуҷҷатҳои мавзеъҳои ҳифзшаванда бо дарназардошти талаботи солҳои охир оид ба пешниҳоди менеҷменти макони номинатсияшаванда пурра карда шаванд.

Коршиносон пешниҳод намуданд, ки барои пешбурди корҳои номинатсионӣ оид ба мероси табиӣ то охири соли 2018 ҳуҷҷатгузорӣ оид ба объектҳои эҳтимолӣ бояд омода ва пажӯҳишҳои илмӣ коркард шаванд.

Инчунин дар назар аст то ҷамъбасти лоиҳаи номинатсияҳо ду семинари дигар, яке моҳи сентябри соли равон дар шаҳри Тошканд ва дигаре-охири соли 2018 дар шаҳри Алмато  доир гарданд.