ТЕЪДОДИ ШИРКАТҲОИ САЙЁҲӢ ДАР ТОҶИКИСТОН БА 140 АДАД РАСИД! Дар Душанбе таҳти унвони «Сайёҳии байналмилалӣ- омили рушди устувор» конференсияи илмӣ-амалӣ баргузор гардид

Сентябрь 29, 2018 10:50

ДУШАНБЕ, 29.09.2018. /АМИТ «Ховар»/.  Имрӯз дар шаҳри Душанбе дар заминаи Соли рушди сайёҳӣ ва ҳунарҳои мардумӣ   таҳти сарпарастии Президенти Федератсияи футболи Тоҷикистон дар ҳамкорӣ бо Мақомоти иҷроияи ҳокимияти давлатии шаҳри Душанбе бахшида ба Рӯзи умумиҷаҳонии сайёҳӣ  таҳти унвони «Сайёҳии байналмилалӣ- омили рушди устувор» Конференсияи илмӣ-амалӣ баргузор гардид.

Тавре мухбири АМИТ «Ховар» хабар медиҳад, дар конференсия роҳбарияти Кумитаи рушди сайёҳӣ, намояндаи Дастгоҳи иҷроияи Президенти Ҷумҳурии Тоҷикистон, Мақомоти иҷроияи ҳокимияти давлатии шаҳри Душанбе, роҳбарони як зумра вазорату идораҳо, намояндагони сафоратҳои муқими шаҳри Душанбе, ширкатҳои сайёҳӣ, осоишгоҳҳо, табобатгоҳҳо, коршиносони соҳа, шарикони рушд ва устодону донишҷӯёни риштаи сайёҳӣ иштирок доштанд.

Дар конференсия   раиси Кумитаи рушди сайёҳӣ Нуъмон Абдуғаффорзода  зикр кард, ки   маҳз бо талошҳои созандаву бунёдкоронаи Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон  захира ва имкониятҳои сайёҳии кишвар ба таври шоиста дар сатҳи байналмилалӣ муаррифӣ ва масъалагузорӣ карда мешаванд.

Роҳбари Кумита иброз дошт, ки имрӯзҳо дар доираи тадбирҳои андешидаи Ҳукумати Ҷумҳурии Тоҷикистон аз ҷониби Кумитаи рушди сайёҳӣ чорабиниҳои сатҳи баланд доир гардида, ширкатҳои сайёҳии ватанӣ барномаҳои ҷалби гурӯҳҳои нави сайёҳиро таҳия ва пешниҳод мекунанд.

«Дар ҳашт моҳи соли равон зиёда аз 60 ширкати нави сайёҳӣ таъсис ва ба бозори сайёҳии мамлакат ворид шуда, аз имтиёзҳои фароҳам овардаи Ҳукумати ҷумҳурӣ бархурдор гардиданд. Дар маҷмӯъ, шумораи ширкатҳои сайёҳӣ ба 140 адад расид»,- зикр намуд Н.Абдуғаффорзода.

Дар ҷамъомад муовини Раиси шаҳри Душанбе Мавсума Муинӣ баён дошт, ки бо қарори Раиси шаҳри Душанбе ҷиҳати рушди соҳаи сайёҳӣ Барномаи рушди сайёҳӣ дар шаҳри Душанбе барои солҳои 2018-2020 ва нақшаи чорабиниҳои татбиқи он тасдиқ гардидааст. Зикр шуд, ки бо мақсади тараққӣ додани инфрасохтори сайёҳӣ ва аҳамияти он дар рушди иқтисодиву иҷтимоии пойтахт дар муҳлатҳои наздик Шӯро оид ба рушди сайёҳӣ таъсис дода мешавад.

Ҳамчунин дар конференсияи мазкур иштирокчиён   вобаста ба ташаббусу дастигириҳои пайвастаи Пешвои миллат ва Ҳукумати мамлакат дар самти рушди соҳаи сайёҳӣ дар Тоҷикистон, таъмини амнияти сайёҳон ва ба роҳ мондани фаъолияти пурсамари таблиғотию иттилоотӣ барои пешниҳоди маҳсулоти сайёҳии миллӣ дар бозори берунаи хизматрасонӣ андешаронӣ намуданд.

Гуфта шуд, ки соли 2017 дар тамоми ҷаҳон қариб 1,2 миллиард сафарҳои байналмилалии сайёҳӣ анҷом дода шуданд ва мувофиқи пешбинии мутахассисон, ин нишондиҳанда то соли 2022 ба 1,4 миллиард ва то соли 2030 ба 1,8 миллиард сафари сайёҳӣ мерасад.

Ин омилҳо аз мо тақозо мекунанд, ки барои рушди сайёҳӣ дар Тоҷикистон аз тамоми имконияту захираҳо истифода бурда, аз манфиатҳои соҳа бархурдор шавем.

 

Сентябрь 29, 2018 10:50

Хабарҳои дигари ин бахш

Имсол ба Вилояти Мухтори Кӯҳистони Бадахшон беш аз 17 ҳазор сайёҳ ворид гардидааст
Душанбе — пойтахти Тоҷикистон ба яке аз шаҳрҳои пешрафтаи сайёҳии дунё табдил ёфтааст
Маконҳои таърихӣ, фарҳангӣ ва сайёҳии Тоҷикистонро беш аз 760 ҳазор сайёҳи хориҷӣ тамошо намуданд
Ҳамкории Тоҷикистон ва Амороти Муттаҳидаи Араб дар соҳаи сайёҳӣ густариш меёбад
Беш аз 100 корманди меҳмонхонаҳои Душанбе малакаю таҷрибаашонро такмил медиҳанд
Ҳайати экспедитсияи сайёҳии «Саёҳат ба қалби Авруосиё -2025» ба шаҳри Истаравшан омад
Байни Тоҷикистон ва Қирғизистон оид ба рушди соҳаи сайёҳӣ Созишнома ба имзо расид
Имсол ба вилояти Хатлон беш аз ним миллион сайёҳ ворид гардидааст
Байни ширкатҳои сайёҳии Тоҷикистон ва Қирғизистон 9 санади ҳамкорӣ ба имзо расид
Мавзеъҳои таърихӣ ва сайёҳии ноҳияи Дарвозро наздики 5000 сайёҳи дохиливу хориҷӣ тамошо намуданд
Дар Литсейи касбии дӯзандагии шаҳри Душанбе Маркази нави таълимию истеҳсолӣ таъсис дода мешавад
РУШДИ САЙЁҲӢ. Имсол ба Мамнуъгоҳи Султон Увайси Қаранӣ беш аз 5 ҳазор меҳмонони дохиливу хориҷӣ ворид шудаанд