Дар шаҳру ноҳияҳои ҷумҳурӣ то ҷашни 30-солагии истиқлолият қариб 18 900 иншооти нав бунёд мегарданд

ДУШАНБЕ, 15.10.2018 /АМИТ «Ховар»/. Дар шаҳру ноҳияҳои кишвар давоми се соли оянда, яъне то ҷашни 30-солагии истиқлолият илова ба 378 иншооте, ки тибқи нақшаи чорабиниҳои бо қарори Ҳукумат тасдиқгардида сохта мешаванд, қариб 18 900 иншооти нав бунёд мегарданд.

Аз ин шумора ба Вилояти Мухтори Кӯҳистони Бадахшон 400, вилоятҳои Суғд 6000, Хатлон 5000, шаҳри Душанбе 3530 ва шаҳру ноҳияҳои тобеи марказ 3422 иншоот рост меояд. Дар ин бора имрӯз Пешвои миллат муҳтарам Эмомалӣ Раҳмон дар Форуми байналмилалии соҳибкорӣ — 2018 таҳти унвони «Рушди соҳибкориву сармоягузорӣ ва равандҳои муосири иқтисодӣ» изҳори андеша намуданд.

Бунёди чунин шумораи бузурги иншооту биноҳои навро Пешвои миллат майдони озмоиши нангу номуси ватандорӣ, ҳисси баланди милливу ватандӯстӣ ва кӯшишу ғайрати соҳибкорону тоҷирон ва дигар шахсони олиҳиммат номида, зикр карданд, ки дар натиҷаи он  ҷумҳурии азизамон ободу зебо шуда, бисёр масъалаву мушкилоти иҷтимоӣ ҳалли худро меёбанд.