Ҳунармандони Тоҷикистон дар саҳнаи Театри калони Москва ҳунарнамоӣ мекунанд
ДУШАНБЕ, 03.10.2018./АМИТ «Ховар»/. Даҳҳо нафар ходимони санъати Тоҷикистон дар маросими ифтитоҳи Рӯзҳои фарҳанги Ҷумҳурии Тоҷикистон дар Федератсия Россия, ки 7 октябр сурат мегирад, дар саҳнаи нави Театри калони давлатии академии Россия баромад мекунанд. Дар ин бора ба АМИТ «Ховар» аз Сафорати Ҷумҳурии Тоҷикистон дар Федератсияи Россия хабар доданд.
«Рӯзҳои фарҳанги Ҷумҳурии Тоҷикистон дар Федератсияи Россия рӯйдоди муҳим барои муколамаи фарҳангӣ ва қадами дигаре дар таърихи дӯстӣ ва ҳамкории Тоҷикистону Россия мегарданд. Тамошобинон дар ин саҳна устодони санъати Тоҷикистон ва ҳайатҳои беҳтарини консертиро хоҳанд дид», — иттилоъ доданд аз сафорат.
Барои меҳмонон ансамблҳои рақсии «Лола», «Парасту», ҳунармандони халқии Тоҷикистон Адҳам Холиқов, Давлатманд Холов, инчунин овозхонон Шарофат Усмонова, Муҳаммадрафии Кароматулло, Соибназар Аловатов, Хуршед Иброҳимов, Зафар Абдуалимов, Амирҷон Рӯзиев, Александр Тагиров, Таҳмина Ниёзова ва Манучеҳр Раҳмонов барномаи ҳунарии худро пешниҳод мекунанд.
Илова бар ин, дар даромадгоҳи Театри калон асарҳои рассомони муосири тоҷик ва аксҳои «Тоҷикистони муосир» ба маъраз гузошта мешаванд.
Дар ин ҷо қабл аз оғози барномаи консертӣ барномаи ҳамкорӣ миёни намояндагони вазоратҳои фарҳанги ду кишвар ба имзо хоҳад расид.
Рӯзҳои фарҳанги Тоҷикистон дар Россия аз 7 то 10 октябр баргузор мегарданд. Дар ин давра дар Китобхонаи давлатии Россия дар Москва намоиши аксҳо ва китоб доир мегардад, ки дар он навгониҳои фарҳанг пешкаши ҳаводорон гардида, кори муаллифони тоҷик ба забони русӣ муаррифӣ мешавад. Инчунин шиносоӣ бо адибони тоҷик сурат мегирад.
Дар баробари консерт ва маросими ифтитоҳи расмӣ дар Театри калони давлатии академӣ, инчунин 8 октябр ҳунарнамоии устодони санъати тоҷик дар Театри калони драмавии ба номи Товстоногов дар назар аст. Даромад ба консертҳо дар Москва ва Санкт-Петербург бо даъватнома, ки Сафорати Ҷумҳурии Тоҷикистон дар Москва ва Консулгарии генералии Ҷумҳурии Тоҷикистон дар пойтахти шимолии Федератсияи Россия тақсим мекунанд, сурат мегирад.
Рӯзҳои 8-10 октябр даромад ба намоишгоҳҳо ройгон аст.
Ёдовар мешавем, ки Рӯзҳои фарҳанги Тоҷикистон дар Россия бори охир соли 2015 доир гардида буданд. Он вақт рӯзҳо дар шаҳрҳои Москва, Калининград ва Раменскойи вилояти Москва баргузор шуда буданд.
Инна Блюшенко аз Швейтсария: «Мақсад дорам забони ширину шевои тоҷикиро омӯзам»
Президенти Академияи миллии илмҳои Тоҷикистон дар Конференсияи байналмилалии «Илм барои бехатарии ҷаҳон» иштирок намуд
35-СОЛАГИИ ИСТИҚЛОЛИЯТИ ДАВЛАТӢ. Дар Чойхонаи миллӣ барои дар як шабонарӯз қабули 5000 мизоҷ шароит фароҳам оварда мешавад
Ба пешвози 700-солагии Ҳофизи Шерозӣ дар Тоҷикистон барномаҳои фарҳангию маърифатӣ доир мешаванд
ШАҲРИСТОНИ ҲУЛБУК. Бозёфтҳои аз ин ёдгорӣ пайдогардида намунаи санъати олии ҳунармандӣ буда, нотакрор мебошанд
«КОРВОНИ КИТОБ». Ба китобхонаҳои шаҳру ноҳияҳои Бадахшон беш аз 6 ҳазор нусха китоб дастрас мегардад
АМИТ «Ховар» ва ҶСП «Ширкати байнидавлатии телевизион ва радиои «Мир»» Ёддошти тафоҳум ба имзо расониданд
Дар Душанбе мубодилаи барномаҳои фарҳангӣ ва намоиши филмҳо байни Тоҷикистон ва Чин баргузор гардид
Дар мавзуи ташаккул ва рушди синошиносӣ дар Тоҷикистон конфронси илмӣ доир гардид
Рӯзҳои фарҳанги Ҷумҳурии Тоҷикистон дар Ҷумҳурии Тотористони Федератсияи Русия доир гардид
Ду озмоишгоҳи Институти химияи Академияи миллии илмҳои Тоҷикистон бо технологияи муосир муҷаҳҳаз карда шуд
Рӯзҳои фарҳанги Ҷумҳурии Тоҷикистон дар Федератсияи Русия идома доранд
