Дар Душанбе оид ба сарфаҷӯӣ ва самаранокии энергия ҳамоиш баргузор мегардад

ДУШАНБЕ, 27.02.2019. /АМИТ «Ховар»/. 6 марти соли равон дар шаҳри Душанбе оид ба сарфаҷӯӣ ва самаранокии энергия ҳамоиш   баргузор мешавад. Дар ин бора аз Вазорати энергетика ва захираҳои оби Ҷумҳурии Тоҷикистон ба мухбири АМИТ «Ховар» хабар доданд.

Ба иттилои манбаъ, ҳамоиш аз ҷониби Вазорати энергетика ва захираҳои оби Ҷумҳурии Тоҷикистон дар мувофиқа бо Ҳукумати Ҷумҳурии Тоҷикистон аз 7 октябри соли 2014 оид ба таъсис додани Гурӯҳи кории байниидоравӣ оид ба татбиқи устувори ташаббусҳо вобаста ба манбаҳои энергияи барқароршаванда, сарфаҷӯӣ ва самаранокии энергия, таҳияи санадҳои зерқонунӣ ва барномаҳои соҳавӣ дар ҳамбастагӣ бо шарикони рушд гузаронида мешавад.

Ба иттилои манбаъ, дар ҷараёни ҳамоиш муаррифии барномаҳои коммуникатсионӣ-иттилоотӣ оид ба пешбурди самаранокии энергия дар Ҷумҳурии Тоҷикистон дар назар дошта шудааст.

Дар назар аст, ки дар кори ҷамъомад намояндагони вазорату идораҳои дахлдори ҷумҳурӣ, намояндагони ВАО, ташкилотҳои ғайридавлатӣ, шарикони рушд ва коршиносони дохиливу хориҷӣ иштирок намоянд.