Калобаҳои риштаи Тоҷикистон дар намоишгоҳи байналмилалии наху риштаи Истанбул муаррифӣ мегарданд

ДУШАНБЕ, 27.02.2019/АМИТ «Ховар»/. Панҷ корхонаи ресандагии Тоҷикистон —   «Ваҳдат Текстил», «РБТ Ресандаи Тоҷикистон», «Ресандаи Қӯрғонтеппа», «Спитамен Текстайлз» ва «ХИМА Текстил» дар Намоишгоҳи байналмилалии  наху риштаи  Истанбул, ки аз 28 феврал то 2 марти соли 2019 дар пойтахти тиҷоратии Туркия доир мегардад, калобаҳои риштаи пахтагини Тоҷикистонро   муррифӣ менамоянд.

Бояд тазаккур дод, ки сафари ҳайати Тоҷикистон ва иштирок дар ин намоишгоҳ бо мусоидати Маркази тиҷорати байналмилалӣ (МТБ) дар доираи Барномаи ҷаҳонии нассоҷӣ ва дӯзандагии МТБ сурат мегирад. Намояндаи ширкати консалтингии «ACT Development Group», шарики маҳаллии МТБ дар ин намоишгоҳ ҳайати Тоҷикистонро роҳбаладӣ мекунад.

Намоишгоҳи байналмилалии наху риштаи Истанбул мизбони беш аз 8000 боздидкунанда аз 80 кишвари ҷаҳон буда, пешсафони соҳаро, ки бозори байналмилалии риштаро муайян мекунанд, гирд меорад. Дар намоишгоҳи  Истанбул, ки ҳамчун «қалби саноати ришта дар АвруОсиё» шуҳрат ёфтааст, нахи пахта, ришта, таҷҳизоти нассоҷӣ ва дӯзандагӣ, маҳсулоти нассоҷӣ ва ғайра ба тамошо гузошта мешаванд.

Иштироки корхонаҳои Тоҷикистон дар намоишгоҳи Истанбул имкони хубест, то онҳо маҳсулоти худро дар саҳнаи байналмилалӣ, махсусан ба харидорони эҳтимолӣ аз Туркия ва кишварҳои дигар намоиш бидиҳанд.

Директори иҷроияи ширкати «ACT Development Group» Рустам Шодибеков мегӯяд, ки «намоишгоҳи байналмилалии  Истанбул ба ширкатҳои мо имкон фароҳам меорад, то бо истеҳсолкунандагони пештози маҳсулоти нассоҷӣ вохӯранд, бренди худро дар бозори минтақавӣ тақвият диҳанд, бо ширкатҳои истеҳсолӣ, воридотӣ ва тоҷирон робита барқарор кунанд, бо талаботи бозор ва равандҳои ҷории  он шинос шуда, барои худ маҳсулоти нав ва навовариҳо кашф созанд».