Рӯзихон Раҳмонова: «Хурсандем, ки садҳо шогирдон аз мо пухтани хӯрокҳои миллӣ, аз ҷумла суманакро ёд гирифтаанд»

Март 22, 2019 10:45

ДУШАНБЕ, 22.03.2019 /АМИТ «Ховар»/. Суманак  рамзи  баҳор буда,  ғизои махсусест, ки танҳо ба ҷашни Наврӯз алоқамандӣ дорад. Суманакро занони солдида дар минтақаҳои Ҳисору Рашт ва Суғду Хатлону Бадахшон бо тарзҳои гуногун тайёр менамоянд.

Сокини шаҳри Турсунзода Рӯзихон Раҳмонова мегӯяд, ки «мо, занони тоҷику ӯзбеки Турсунзодашаҳр барои пухтани суманак гандумро тоза карда, дар оби хунук мешӯем ва сипас дар як зарф се рӯз тар карда, нигоҳ медорем. Баъди неш задани гандум онро ба рӯи тахтаи тоза ё табақҳои чӯбин рехта, дар ҷои соя мегузорем ва то сабзидан ҳар пагоҳӣ об мепошем. Тақрибан баъди 3 — 4 рӯзи  сабзидани гандум майсаи онро қима карда, ё дар зарфҳои махсус кӯфта, аз болояш об мерезем. Сипас се маротиба аз дока фишурда, шираашро дар зарфҳои алоҳида гирифта, нигоҳ медорем. Баъдан шираи сабзаи гандумро дар дег рехта, дар оташи баланд меҷӯшонем».

Холаи Рӯзихон гуфт, ки «ба ҳайси мураббӣ дар Хонаи кӯдакони ятими шаҳри Турсунзода фаъолият дорам ва ҳамасола дар арафаи ҷашни Наврӯз барои хурсандии ятимон дар ин даргоҳ мо суманак мепазем. Дар маросими суманакпазии мо дар интернат  чанд нафар занони ботаҷриба ва духтаракони ятим гирд омада, бо нияти нек ва дуову орзуҳо деги суманакро оташ мегиронем.
Як анъанаи муҳими минтақаи мо дар суманакпазӣ ҳамин аст, ки бо навбат  дегро кофта, барои пешгирии насӯхтани дег 7 санча  ба даруни дег мепартоем ва пас аз тайёр шудани суманак ин сангчаҳо дар косаи кадом нафаре омад, онро бо нияти нек дар ҷойи пок нигоҳ медорад».  

Рӯзихон Раҳмонова иброз медорад, ки аз солхӯрдагон шунидаем, ки суманак ғизои покон буда, бо чашиданаш орзуву ормони инсон мешиканад. Аз ин рӯ мо кӯшиш менамоем, ки таги деги суманак насӯзад, чунки бо сӯхтани суманак таркибаш вайрон мешавад ва бӯйи нофорам паҳн мегардад. Ҳамчунин ҳезуми суманакро қаблан омода менамоем.

Рӯзихон зикр намуд, ки «мо, занони таҷрибадор аз он хурсандем, ки садҳо шогирдони муассиса аз мо   пухтани хӯрокҳои миллӣ, аз ҷумла суманакро ёд гирифта, ба насли ояндаи миллат мерасонанд. Ба ин восита хӯрокҳои миллӣ аз байн намераванду таърихи ниёгони мо ҳамеша зинда мемонад».

Дар шаҳри Турсунзода, ки  ду миллати бо ҳам дӯсту бародар зиндагӣ менамоянд, суманаки дегиро  якҷоя бо хешону ҳамсоягон дар дегҳои калон 24 соат мепазанд ва дар гирди деги суманак рақсу бозӣ ва сурудхонӣ мекунанд. Дар ҷашни Наврӯзи ҷаҳонӣ ғайр аз суманак хӯроки якум шир, нони навпухташударо истифода мебаранд, зеро ин хӯрокҳо рамзи «хубӣ» ва «хушӣ» доранд.  Инчунин дар ҷашни Наврӯз дар ин минтақа дар баробари пухтани суманак гандумкӯча ё кӯча, самбӯса бо пудина ва ҷағ-ҷағ, ғӯлингоб аз қадим    мерос мондааст.

Субҳониддини МАҲМУД,
 АМИТ «Ховар»

Март 22, 2019 10:45

Хабарҳои дигари ин бахш

Кумита оид ба таҳсилоти ибтидоӣ ва миёнаи касбӣ бахшида ба Рӯзи Ваҳдати миллӣ конфронс доир намуд
Дар Агентии суғуртаи иҷтимоӣ ва нафақа 28-солагии Рӯзи Ваҳдати миллиро ҷашн гирифтанд
Дар Душанбе вобаста ба иҷрои Барномаи миллии ташаккули тарзи ҳаёти солим ҷаласа баргузор гардид
Дар Душанбе Конфронси ҷумҳуриявӣ таҳти унвони «Ваҳдат – мароми модарон» баргузор шуд
Дар Душанбе вобаста ба хизматрасониҳои молиявӣ ва ҳуқуқи соҳибкорон конфронси ҷумҳуриявӣ доир гардид
Сафари Корвони «Модарони ваҳдатсаро» ба шаҳру ноҳияҳои ҷумҳурӣ оғоз гардид
Дар Озарбойҷон Конфронси байналмилалии ҳизбҳои сиёсӣ баргузор шуд
Фестивали дӯстии ҷавонон-2025 оғоз шуд
Бахшида ба Рӯзи ҷаҳонии донори хун дар Тоҷикистон маъракаи хунсупорӣ гузаронида шуд
Дар Женева масъалаи кушодани марказҳои раводиди давлатҳои Иттиҳоди Аврупо дар Тоҷикистон баррасӣ гардид
Бахшида ба ҷашни Ваҳдати миллӣ Корвони «Модарони ваҳдатсаро» ташкил мегардад
Дар Женева ҳамкорӣ байни Тоҷикистон ва Созмони байналмилалии меҳнат баррасӣ гардид