«ИЛОҶИ ВОҚЕА ПЕШ АЗ ВУҚӮЪ…». Мулоҳизаҳои коршинос дар ҳошияи муроҷиати ШСХК «Барқи тоҷик»

Апрель 2, 2019 10:28

ДУШАНБЕ, 02.04.2019 /АМИТ «Ховар»/. Ширкати саҳомии холдингии кушодаи «Барқи тоҷик» 29 марти соли равон бобати пардохти саривақтии ҳаққи истифодаи барқ ба муштариён муроҷиат намуд, ки масъулияти баланд нишон диҳанд ва барои ошкор намудани ҳодисаҳои истифодаи ғайриқонунии неруи барқ бетарафӣ накунанд. Муроҷиатномаи ШСХК «Барқи тоҷик» аз ҷониби коршиносону намояндагони табақаҳои гуногуни ҷомеа дастгирӣ  пайдо намуд.

Аз ҷумла, тавре муовини сардори раёсати тадқиқоти масъалаҳои соҳавии Маркази тадқиқоти стратегии назди Президенти Ҷумҳурии Тоҷикистон Умед Давлатов ба хабарнигори АМИТ «Ховар» изҳор дошт,  «дар урфият мегӯянд, ки илоҷи воқеа пеш аз вуқӯъ.  Чуноне масъулини ширкат дар муроҷиатнома таъкид намудаанд, барои таъмини бе таваққуфи барқи ҳар як шахс ва кишвар, таъмири хатҳои барқ,  трансформаторҳои иқтидорҳояшон мухталиф, бунёди неругоҳҳои нав, таъмиру таҷдиди онҳо маблағҳои калон заруранд. Ба ғайр аз ин ширкат ҳар сол танҳо барои истифодаи об то 40 миллион сомонӣ андози роялтӣ месупорад. Ҳадаф аз ин таъкид ин аст, ки ҳар як муштарӣ агар ҳаққи барқи истифодашударо пардохт насозад, барои таъминоти пурраи ҷумҳурӣ бо барқ душвориҳои ҷиддӣ пеш меоянд ва ҳатто имкони бемаҳдудият бо барқ таъмин намудани ҷумҳурӣ бо неруи барқ халалдор мегардад. Дар ҳақиқат дар осон гардидани ин мушкилӣ саҳми аҳолӣ хеле калон аст, бо шарте, ки ҳамаи муштариён сари вақт ва пурра ҳаққи барқро пардохт намоянд».

Ба андешаи номбурда, ҳар як муштарӣ вақте ки аз барқ истифода мебарад, бояд ҳатман маблағашро пардохт намояд. Зеро ин барои бо барқ таъмин будан ва такроран истеҳсол намудани неруи барқ хеле зарур аст.

Дар муроҷиатнома инчунин зикр шудааст, ки ширкат имконияти техникии ба таври алоҳида хомӯш намудани барқи ҳар як муштарии қарздорро надорад. Аз ин рӯ, дар натиҷаи зам шудани қарзҳо  зарур  меояд, ки деҳаҳои алоҳида, ҷамоатҳо, шаҳраку маҳаллаҳоро аз барқ маҳрум созад. «Дар чунин ҳолат нисбат ба муштариёне, ки маблағи барқи истифода бурдаашонро сари вақт пардохт менамоянд, беинсофӣ мешавад. Яъне мо набояд ба ҳамсояи худ зарар расонем. Яке аз одобҳои муқаррарнамудаи ислом барои мусалмон нисбат ба ҳамсоя ин аст, ки ҳеҷ гоҳ ба вай озору газанд нарасонад, балки ӯро аз озор ва азияту таҳқир ҳимоя намояд»,-гуфт номбурда.

Дар муроҷиатнома дар мавриди мушкилоти ҷойдоштаи дигари соҳа-дуздидани барқ махсус гуфта шудааст. Умед Давлатов зикр кард, ки ҳарчанд нисбат ба даҳ соли охир маърифати мардум дар истифодаи сарфакорона ва мақсадноки неруи барқ боло рафта бошад ҳам, вале то ҳол аз ҷониби шахсони алоҳида дуздии барқ ба мушоҳида мерасад.

Ҳамсуҳбат пешниҳод намуд, ки нафароне, ки дидаву дониста ба дуздидани барқ даст мезананд, ба хазинаи давлату ҷомеа даст мехалонанд, ҳаққи ҳамсояву ҳамдеҳаро аз худ мекунанд, бояд ҷиддитар муҷозот шаванд. Мусоҳиби мо дар фарҷом аз муштариён-сокинон даъват кард, ки дар ин кор кумаку дастгирии худро дареғ надоранд, зеро ин амал ба манфиати тамоми ҷомеа мебошад.

Мавҷуда АНВАРӢ,
АМИТ «Ховар»

Апрель 2, 2019 10:28

Хабарҳои дигари ин бахш

Байни сохторҳои мониторинги молиявии Тоҷикистону Русия ду санади ҳамкорӣ ба имзо расид
Дар доираи COP31 Тоҷикистон, Умон ва Непал роҳҳои ҳалли мушкилоти обу иқлимро баррасӣ карданд
Соли 2027 дар гузаргоҳи гумрукии ноҳияи Спитамен сохтмон ва насби таҷҳизоти сканкунии борҳо оғоз мегардад
Ҷаласаи 45-уми пленарии Гурӯҳи Авруосиё ба таъмини амнияти иқтисодию молиявӣ мусоидат менамояд
Ҳайати Тоҷикистон дар чорабинии сатҳи баланди вазирони Осиёи Марказӣ оид ба тағйирёбии иқлим иштирок намуд
Дар Фурудгоҳи байналмилалии Душанбе беш аз 3,5 кило маснуоти тиллоӣ мусодира карда шуд
Фонди иқлими сабз барои рушди соҳаи тандурустии Тоҷикистон 2 миллион доллар ҷудо менамояд
Лоиҳаи «Барномаи нави саноатикунонии босуръати Тоҷикистон барои солҳои 2026-2030» таҳия гардидааст
Масъалаҳои баргузории Форуми B5+1 дар Душанбе баррасӣ шуданд
Тоҷикистон ба Конвенсияи СММ оид ба мубориза бо биёбоншавӣ пешниҳод намуд, ки соли 2027 миссияи техникӣ ташкил карда шавад
Бо сабаби фаъолият накардани корхонаи «Хишти Тоҷикобод» сокинон ин масолеҳи сохтмониро аз Душанбе ва Ваҳдат бо роҳкирои гарон ворид менамоянд
Дар Минтақаи озоди иқтисодии «Ишкошим» ба маблағи беш аз 1 миллион сомонӣ кору хизматрасонӣ анҷом дода шуд