Риояи меъёр ва қоидаҳои бехатарӣ ҳангоми хизматрасонӣ — яке аз омилҳои муҳими ҷалби сайёҳон

Апрель 27, 2019 10:47

ДУШАНБЕ, 27.04.2019. /АМИТ «Ховар»/. Бо ташаббуси Шуъбаи рушди сайёҳии вилояти Суғд ва дастгирии Кумитаи рушди сайёҳии назди Ҳукумати Ҷумҳурии Тоҷикистон дирӯз дар шаҳри Панҷакент бахшида ба Солҳои рушди деҳот, сайёҳӣ ва ҳунарҳои мардумӣ дар мавзӯи «Риояи меъёр ва қоидаҳои бехатарӣ ҳангоми хизматрасонӣ ба сайёҳон» семинари омӯзишӣ баргузор гардид. Дар ин бора ба АМИТ «Ховар» аз Кумитаи рушди рушди сайёҳӣ хабар доданд.

Дар чорабинии мазкур роҳбарияти Кумитаи рушди сайёҳӣ ва мақомоти иҷроияи ҳокимияти давлатии шаҳри Панҷакент, намояндагони Кумитаи ҳолатҳои фавқулода ва мудофиаи гражданӣ, роҳбарони ширкатҳои сайёҳии минтақа, ташкилотҳои ҷамъиятӣ, меҳмонхонаҳо, тарабхонаву ошхонаҳо, ронандагони таксиҳо ва донишҷӯёни риштаи сайёҳӣ иштирок намуданд.

Дар кори чорабинӣ масъалаҳои таъмини бехатарии ҳамлу нақл, бехатарии сайёҳон дар минтақаҳои душворгузар, дар ҳолатҳои фавқулода, ҳангоми истироҳати экстремалии (ғайриоддӣ) сайёҳон, ҳангоми вохӯрдан бо ҳайвонҳои хавфнок, бехатарии фаъолияти муассисаҳои сайёҳӣ, бехатарии ҷанбаҳои тиббӣ, бехатарии туризми воридотӣ ва содиротӣ, тавсияҳо оид ба бехатарӣ ба сайёҳони хориҷӣ мавриди баррасӣ қарор дода шуданд.

Ҳамчунин иштирокчиёни чорабинӣ аз як қатор мавзеъҳои таърихию сайёҳии шаҳри Панҷакент, аз ҷумла мақбараи Хоҷа Муҳаммади Башоро ва хонамузейи Лоиқ Шералӣ дидан намуданд.

Дар интиҳо иштирокдорони семинар зикр намуданд, ки баргузории чунин чорабиниҳо ба баланд намудани сатҳи фаҳмиши ҷомеа оид ба афзалиятҳои соҳаи сайёҳӣ ва тараққӣ ёфтани соҳаи сайёҳии минтақа, инчунин ҳавасманд гардонидани соҳибкорон ба рушди сайёҳӣ заминаи мусоид фароҳам меорад.

Бояд гуфт, ки шаҳри Панҷакент дорои табиати афсункор ва мавзеъҳои таърихии зиёд буда, яке аз беҳтарин мавзеъҳои сайёҳӣ дар вилояти Суғд ба шумор меравад. Минтақаи мазур барои рушди сайёҳии таърихию фарҳангӣ ва этногарфӣ, инчунин сайёҳии экологӣ мусоид аст. Мавҷудияти яке аз маконҳои таърихӣ — Саразм, ки ба рӯйхати мероси умумиҷаҳонии ЮНЕСКО шомил гардидааст, диққати сайёҳонро ба худ бештар ҷалб месозад.

Мавриди зикр аст, ки соҳаи сайёҳии Тоҷикистон тибқи баҳогузориҳои созмонҳои байналмилалӣ ба даҳгонаҳои беҳтарини кишварҳои ҷолиб, роҳҳои зеботарини дунё, мавзеъҳои бехатар аз рӯи таъмини амнияти шабона, аз рўи сайёҳии пиёдагардӣ ва саргузаштӣ, панҷгонаи беҳтарин аз рўи низоми соддаи пешниҳоди раводид ва дигар эътирофҳои ҷаҳонӣ сазовор гаштааст.

Апрель 27, 2019 10:47

Хабарҳои дигари ин бахш

Эмомалӣ Раҳмон: «Миқдори сайёҳон ба Вилояти Мухтори Кӯҳистони Бадахшон 13 баробар афзудааст»
РУШДИ САЙЁҲӢ. Имсол ба вилояти Суғд беш аз 242 ҳазор меҳмони хориҷӣ ворид шудааст
РУШДИ САЙЁҲӢ. Табиати дилфиреби Хатлонзаминро беш аз 400 ҳазор нафар сайёҳон тамошо намуданд
Сарвари давлат Эмомалӣ Раҳмон дар ноҳияи Дарвоз аз деҳаи этнографии комплекси сайёҳии «ЗЕВ.С» дидан намуданд
Пешвои миллат Эмомалӣ Раҳмон дар ноҳияи Дарвоз ба фаъолияти комплекси сайёҳии «ЗЕВ.С» оғоз бахшиданд
РУШДИ САЙЁҲӢ. Имсол 1612 нафар сайёҳон табиати нотакрори Бадахшонро тамошо карданд
«ХАТЛОН-ҚАЛБИ ГАРМИ САЙЁҲӢ». Дар шаҳри Кӯлоб форум ва намоишгоҳи байналмилалии сайёҳӣ доир гардид
«САЁҲАТ БА ҚАЛБИ АВРУОСИЁ». 12 июл иштирокчиёни экспедитсияи байналмилалӣ ба Тоҷикистон мерасанд
«ХАТЛОН-ҚАЛБИ ГАРМИ САЙЁҲӢ». Дар Кӯлоб форум ва намоишгоҳи байналмилалии сайёҳӣ доир мешавад
Дар мавзуи «Нақши Ваҳдати миллӣ дар рушди иқтисоди миллӣ ва сайёҳию соҳибкорӣ» ҳамоиш баргузор шуд
Экспедитсияи сайёҳии «Саёҳат ба қалби Авруосиё-2025» аз Москва оғоз гардид
Тоҷикистону Ҳиндустон ҳамкории фарҳангӣ ва сайёҳиро таҳким мебахшанд