Меҳмонони наврас бори нахуст аз Осорхонаи миллии Тоҷикистон дидан намуданд

ДУШАНБЕ, 30.05.2019 /АМИТ «Ховар»/. Тавре қаблан иттилоъ додем,  имрӯз 200 нафар иштирокдорони  фестивали  «Мо насли хушбахти замон» аз Осорхонаи миллии Тоҷикистон дидан намуданд.  Меҳмононро шахсони масъули Осорхона  истиқбол гирифта, ба онҳо дар сатҳи баланди касбӣ сайрҳои осорхонавӣ гузарониданд.

Бояд гуфт, ки меҳмонон бо диққати махсус ва рағбати зиёд экспозитсияи Осорхонаи миллии Тоҷикистонро тамошо намуданд. Иштирокчиёни фестивал наврасони минтақаҳои гуногуни ҷумҳурӣ  буда, аксарияти онҳо бори нахуст аз ин маркази фарҳангӣ дидан намуданд.

Ба воситаи сайрҳои осорхонавӣ меҳмонон дар шуъбаи табиат оид ба канданиҳои фоиданок, иқлим, набототу ҳайвонот ва парваришгоҳу мамнуъгоҳҳои Тоҷикистон маълумот гирифтанд.

Онҳо аз  шуъбаи таърихи бостон ва асрҳои миёна,  аз бозёфтҳои давраҳои гуногуни таърихӣ,  шурӯъ аз асри санг то асри XX, аз ҷумла бозёфтҳои «Саразм», толори «Оини Зардуштия», «Империяи Ҳахоманишиҳо» «Империяи Кушониён», «Сосониён», «Панҷакенти қадим», «Бунҷикат», гӯшаи «Фарҳанги исломӣ», «Сомониён», толорҳои «Хушнависӣ» ва «Сиккаҳо» дидан намуданд.

Тавре ба мухбири АМИТ «Ховар» сардори шуъбаи экскурсионӣ ва оммавии Осорхонаи миллӣ  Фаридун Кенҷаев иттилоъ дод, бо мақсади таҳкими дӯстӣ байни наврасони мамлакат  ва дар рӯҳияи инсондӯстӣ, ифтихори ватандорӣ, эҳтиром ба арзишҳои миллӣ, умумибашарӣ ва фарҳангӣ тарбия намудан онҳо  ин боздид ташкил гардид.

Дар шуъбаи таърихи нав ва навтарин ба меҳмонон дастовардҳои ҷумҳурӣ  дар солҳои соҳибистиқлолӣ дар соҳаҳои маориф, фарҳанг, тандурустӣ ва варзиш муаррифӣ гардида, ҳамчунин онҳо аз толори «Туҳфаҳои Президенти Ҷумҳурии Тоҷикистон» дидан намуданд.

Меҳмонон инчунин  дар шуъбаи санъати тасвирӣ ва амалӣ бо ҳунарҳои  рассомӣ, кандакорӣ дар рӯи чӯб, кундал ва дигар намунаҳои ҳунарҳои мардумӣ шинос гардиданд.