Донишгоҳи давлатии тиббии Тоҷикистон имсол 1 ҳазору 556 нафар мутахассиси дорои таҳсилоти олии тиббиро тайёр намуд

Июнь 11, 2019 12:00

ДУШАНБЕ, 11.06.2019. /АМИТ «Ховар»/. Имсол  Донишгоҳи давлатии тиббии Тоҷикистон ба номи Абӯалӣ ибни Синоро  1 ҳазору 556 нафар донишҷӯён бомуваффақият хатм намуданд.

Тавре ба мухбири АМИТ «Ховар» аз Вазорати тандурустӣ ва ҳифзи иҷтимоии аҳолии Ҷумҳурии Тоҷикистон хабар доданд, ин донишҷӯён соҳиби маълумоти олии касбӣ аз рӯи 5 ихтисос гардиданд, ки аз ин шумора 123 нафарашон шаҳрвандони хориҷӣ аз 7 кишвари дунё  мебошанд.

Дар маросими  тантанавии супоридани дипломҳои донишҷӯёни донишгоҳ, ки аз курсҳои олии таълимӣ гузашта, аттестатсияи давлатиро бомуваффақият супоридаанд,  Вазири тандурустӣ ва ҳифзи иҷтимоии аҳолии Ҷумҳурии Тоҷикистон Насим Олимзода, ректори донишгоҳ, профессор Маҳмадшоҳ Гулзода, Сардори хадамоти назорати давлатии тандурустӣ ва ҳифзи иҷтимоии аҳолӣ Султон Бекмуродзода, ҳамчунин ҳайати профессорону омӯзгорони донишгоҳ ва волидони хатмкунандагон иштирок намуданд.

Н.Олимзода зимни ироаи таманниёти табрикӣ ба хатмкунандагон иброз намуд, ки хатми бомуваффақияти ин муассисаи бонуфузи таълимӣ барои онҳо мояи ифтихор аст. Ӯ таъкид намуд, ки ҳамасола дар баробари донишҷӯёни ватанӣ, шаҳрвандони ҳориҷӣ низ донишгоҳро хатм менамоянд, ки ин далели дар сатҳи байналмилалӣ эътироф гардидани мавқеи Донишгоҳи давлатии тиббии Тоҷикистон  ба номи Абӯалӣ ибни Сино мебошад.

Ҳамчунин Ректори донишгоҳи мазкур профессор Маҳмадшоҳ Гулзода донишҷӯёни хатмкунандаро барои анҷоми бомуваффақияти донишгоҳ таҳният намуда, бо таваҷҷуҳ ба мавқеи Донишгоҳи давлатии тиббии Тоҷикистон ба номи Абӯалӣ ибни Сино дар омода намудани кадрҳои тиббии кишвар зикр  намуд, ки донишгоҳ тӯли 80 соли фаъолияти босамар бештар аз 43000 мутахассиси дорои таҳсилоти олии тиббиро тайёр намудааст ва онҳо на танҳо дар дохили мамлакат, ҳатто берун аз он низ маъруф гардидаанд.

Инчунин М.Гулзода   бо муроҷиат ба хатмкунандагон таъкид намуд, ки ба даст овардани диплом оид ба хатми донишгоҳ ин маънои хотима не, балки давомнокӣ ва оғоз намудани роҳ ба сӯи илм, ҷараёни мураккаб, самарабахш, вале ҷолиб ва шаъну шараф мебошад. Дар пеш хатмкунандагонро санҷиши муҳимтарини касбӣ интизор аст.

Ректори донишгоҳ бо боварии комил баён намуд, ки хатмкунандагон аз уҳдаи вазифаҳои муқарраргардида ба хубӣ баромада, фаъолияти худро дар соҳаи илм ва тандурустӣ бо шаъну шараф идома хоҳанд дод.

Июнь 11, 2019 12:00

Хабарҳои дигари ин бахш

ИМА барои дастгирии аҳолии Тоҷикистон 75 тонна ғизои ғанигардонида кумак расонид
Сокинони Рашт ба густариш бахшидани худшиносию худогоҳии миллӣ ва ватандӯстӣ даъват карда шуданд
«Биё! Бисоз 2.0»: тарофаи шумо — қоидаҳои шумо
Имрӯз дар водиҳои Тоҷикистон ҳаво то 34 дараҷа гарм мешавад
Душанбе мизбони ҷаласаи навбатии Шурои ҳамкории фарҳангии ИДМ мегардад
Рушди робитаҳои иқтисодию молиявии Тоҷикистон ва Чин баррасӣ гардид
Имрӯз дар ноҳияҳои алоҳидаи Тоҷикистон борони кӯтоҳмуддат меборад
«ИЛМ-ФУРӮҒИ МАЪРИФАТ». Дар Хатлон даври вилоятии озмун оғоз гардид
Имрӯз дар шаҳри Душанбе ҳаво то 36 дараҷа гарм мешавад
Имрӯз дар водиҳои Тоҷикистон ҳаво то 36 дараҷа гарм мешавад
Дар Хоруғ маркази савдои муосир ба истифода дода шуд
Дар баъзе минтақаҳои Тоҷикистон баландшавии ҳолати ифлосшавии ҳавои атмосферӣ дар назар аст