Ҷамолиддин Нуралиев: БМТ низоми идоракунии корпоративиро яке аз самтҳои муҳим дар сиёсати ислоҳоти худ қарор додааст

Июль 26, 2019 14:22

ДУШАНБЕ, 26.07.2019/АМИТ «Ховар»/. Бонки миллии Тоҷикистон масъалаи низоми идоракунии корпоративиро дар соҳаи бонкӣ яке аз самтҳои муҳим ва афзалиятнок дар сиёсати ислоҳоти худ  қарор дода, барои тақвияти он тадбирҳои зарурӣ меандешад. Дар ин самт шарикии институтҳои байналмилалӣ низ саҳм дорад. Ин нуктаро муовини аввали раиси Бонки миллии Тоҷикистон Ҷамолиддин Нуралиев дар ҳамоише, ки дар Душанбе бо иштироки намояндагони Бонки ҷаҳонӣ, саҳомон, аъзои Шӯрои нозирон ва роҳбарони ташкилотҳои қарзӣ доир гардид, иброз дошт. Ҳамоиш дар доираи ҳамкорӣ бо Барномаи Бонки ҷаҳонӣ «Оид ба тақвият ва баланд бардоштани фаъолияти бахши молиявӣ» ва Корпоратсияи байналмилалии молиявӣ роҳандозӣ гардида, дар идоракунии самарабахши корпоративии низоми бонкии мамлакат мусоидат менамояд.

Ҷамолиддин  Нуралиев зикр намуд, ки ба сатҳи баланди фарҳанги корпоративӣ дар ҳолати риояи принсипҳо ва стандартҳои идоракунии корпоративӣ, мониторинги доимии фаъолияти ташкилотҳои қарзӣ, ташаккули низоми самарбахши идоракунии хавфҳо ва назорату аудити дохилӣ ноил шудан имконпазир аст. Бонкҳое, ки низоми идоракунии корпоративиашон дуруст ба роҳ монда нашудааст, барои тамоми низоми молиявии мамлакат хавф эҷод мекунанд. Маҳз бинобар надоштани низоми мукаммали идоракунии корпоративӣ дар давраи буҳрони иқтисодии панҷ сол қабл бонкҳо натавонистанд ба шокҳои беруна муқовимат кунанд ва ба мушкилот гирифтор шуданд, ки имрӯз ба низом таъсири бевоситаи худро мерасонанд.

Ҷамолиддин Нуралиев ҳамзамон таъкид сохт, ки ҳадафи  низоми идоракунии корпоративӣ ташаккул ва баланд бардоштани боварии аҳолӣ ба низоми бонкӣ буда, ба устуворӣ ва эътимоднокии фаъолияти минбаъдаи ташкилотҳои қарзӣ мусоидат менамояд. Зеро ташкилотҳои қарзӣ ҳамчун миёнаравҳои молиявӣ бо ҷалби сармоя ва ба ин васила дастгирии соҳибкории истеҳсолӣ  дар рушди иқтисодиёт нақши муҳим мебозанд.

Инчунин намояндаи доимии Бонки ҷаҳонӣ дар Тоҷикистон Ян Петер Олтерс гуфт, ки «Бонки ҷаҳонӣ дар ҳамбастагӣ бо Бонки миллии Тоҷикистон ба муҳимияти идоракунии корпоративӣ диққати махсус зоҳир намуда, оид ба мукаммал намудани санадҳои меъёрию ҳуқуқии вобаста ба идоракунии корпоративии ҷавобгӯ ба таҷрибаи байналмилалӣ тадбирҳои зарурӣ меандешанд».

Дар ҳамоиш мутахассисони Бонки ҷаҳонӣ оид ба идоракунии корпоративӣ иштирокдоронро бо сохти идоракунии корпоративӣ дар Тоҷикистон, афзалияти он дар ташкилотҳои қарзӣ, тафовути  идоракунии корпоративӣ дар қиёс бо менеҷмент, нақши Шӯрои нозирон ва мақоми саҳомон,  аз ҷумла ҳайат, уҳдадорӣ, шакли раванди  идоракунӣ ва нақши ҳайати котиботи корпоративӣ дар рушди сазовори идорӣ дар ташкилотҳо шинос намуданд.

Июль 26, 2019 14:22

Хабарҳои дигари ин бахш

Тоҷикистон: Дар беш аз 590 ҳазор гектар шудгор гузаронида шудааст
РУШДИ КИРМАКПАРВАРӢ. Дар Ҷамоати деҳоти Саразми шаҳри Панҷакент 30 ҳазор бех ниҳоли тут шинонида шуд
Кишоварзони ноҳияи Абдураҳмони Ҷомӣ дар беш аз 8 ҳазор гектар пунбадона кишт менамоянд
Баҳодур Шерализода дар Самарқанд доир ба омодагӣ ба Конференсияи байналмилалии сатҳи баланд оид ба ҳифзи пиряхҳо маълумот дод
Дар шаҳри Душанбе иҷрои «Барномаи фишанги ҳамоҳангсозии сиёсат» баррасӣ гардид
Ҳаҷми гардиши савдои хориҷии Тоҷикистон ва Узбекистон соли 2024 1,74 маротиба зиёд гардид
Барномаи савдои электронӣ дар Тоҷикистон ба баланд бардоштани малакаи рақамию молиявии аҳолӣ ва соҳибкорон равона шудааст
Оё дар Тоҷикистон низоми кишти пунбадона тағйир меёбад? Шарҳи коршиносон дар ин мавзуъ
Дар шаҳри Гулистон Бизнес-форуми Тоҷикистон ва Тотористон баргузор гардид
Имконоти сайёҳии Тоҷикистон дар Намоишгоҳи байналмилалии сайёҳии «Лето-2025» муаррифӣ шуданд
Ҳайати Тотористон бо фаъолияти як қатор корхонаҳои саноатии вилояти Суғд шинос гардид
Дар ноҳияи Кӯшониён дар 320 гектар гармхона бунёд карда шудааст