Таҳти раёсати муовини Сарвазири Тоҷикистон Азим Иброҳим ҷаласаи навбатии Кумитаи миллии ҳамоҳангсозӣ оид ба мубориза бо СПИД, сил ва вараҷа баргузор гардид

Ноябрь 18, 2019 18:00

ДУШАНБЕ, 18.11.2019 /АМИТ «Ховар»/. Охири ҳафтаи гузашта  таҳти раисии муовини Сарвазири Ҷумҳурии Тоҷикистон, Раиси Кумитаи миллии ҳамоҳангсозии мубориза бо СПИД, сил ва вараҷа  дар Ҷумҳурии Тоҷикистон  Азим Иброҳим  ҷаласаи навбатии Кумитаи  миллии ҳамоҳангсозӣ баргузор гардид.

Дар ҷаласа аъзои Кумитаи  миллии ҳамоҳангсозӣ, намояндагони созмонҳои байналмилалӣ ва дигар шахсони даъватшуда ширкат варзиданд.

Зимни мулоқот масъалаҳои татбиқи Барномаи миллии мубориза бо бемории ВНМО дар Ҷумҳурии Тоҷикистон барои солҳои 2017-2020 баррасӣ шуданд. Ҳамзамон нақшаи кории Кумитаи  миллии ҳамоҳангсозии мубориза бо СПИД, сил ва вараҷа дар Ҷумҳурии Тоҷикистон барои соли 2020, нақшаи кори Комиссияи назорат дар назди Кумитаи миллии  ҳамоҳангсозӣ оид ба мубориза бо СПИД, сил ва вараҷа дар Ҷумҳурии Тоҷикистон барои соли 2020 ва пешниҳоди ворид намудани тағйирот ба ҳайати Комиссияи назоратии назди Кумитаи миллии ҳамоҳангсозӣ оид ба мубориза бар зидди СПИД, сил ва табларза дар Ҷумҳурии Тоҷикистон муҳокима гардид.

Зимни муҳокимаи масъалаҳо муайян карда шуд, ки дар ҷумҳурӣ  иҷрои барномаҳои давлатии мубориза бо СПИД аз ҷониби сохторҳои марбута  дар сатҳи зарурӣ қарор надорад. Дар асоси муҳокимаи ҳисоботи Вазорати меҳнат, муҳоҷират ва шуғли аҳолии Ҷумҳурии Тоҷикистон маълум гардид, ки вазорат корҳои муайянро оид ба пешгирии ВНМО/ СПИД дар байни муҳоҷирони меҳнатӣ анҷом додааст. Аммо, раиси Кумитаи  миллии ҳамоҳангсозӣ фаъолияти Вазорати меҳнат, муҳоҷират ва шуғли аҳолии Ҷумҳурии Тоҷикистонро оид ба пешгирии ВНМО/СПИД дар байни муҳоҷирони меҳнатӣ нокофӣ эътироф кард.

Ӯ дастур дод, ки кумак ба муҳоҷирон ва аъзои оилаҳои онҳоро бояд тақвият бахшид. Вай инчунин иброз кард, ки марказҳои омодагии пеш аз сафари муҳоҷирон ва шуъбаҳои Намояндагии Вазорати меҳнат, муҳоҷират ва шуғли аҳолии Ҷумҳурии Тоҷикистон дар Федератсияи Россия  бояд корро дар ин масир пурзӯр намоянд.

Ҳисоботи Сарраёсати иҷрои ҷазои ҷиноятии Вазорати адлияи Ҷумҳурии Тоҷикистон дар бораи иҷрои Барномаи миллии мубориза бо бемориҳои ВНМО барои солҳои 2017-2020 шунида шуд ва мусбат арзёбӣ гардид. Раиси Кумитаи  миллии ҳамоҳангсозӣ ба роҳбарияти Сарраёсати иҷрои ҷазои ҷиноятӣ ва Вазорати тандурустӣ ва ҳифзи иҷтимоии Ҷумҳурии Тоҷикистон дастур дод, ки пешниҳоди хизматрасониҳои тиббии мувофиқро барои шахсони мубталои ВНМО, ки аз муассисаҳои ислоҳӣ озод карда мешаванд, беҳтар созанд.

Аз ҷониби Вазорати молияи Ҷумҳурии Тоҷикистон зикр карда шуд, ки ҳамасола маблағгузорӣ барои амалисозии барномаҳои миллии ВНМО дар Ҷумҳурии Тоҷикистон аз буҷаи давлат зиёд карда мешавад, аз ҷумла соли оянда маблағгузорӣ аз буҷети давлатӣ барои санҷиши ин беморӣ  1 миллион сомонӣ афзоиш меёбад.

Зимни муҳокима намояндагони USAID дар Тоҷикистон, ассотсиатсияи ғайридавлатии байналмилалии “Табибони бидуни марз ” ва дигар созмонҳои ғайриҳукуматӣ аз ҳамкорӣ бо Вазорати тандурустӣ ва ҳифзи иҷтимоии аҳолии Ҷумҳурии Тоҷикистон ва дигар вазорату идораҳо изҳори қаноатмандӣ карда, омодагии худро ҷиҳати идомаи маблағгузории барномаҳои давлатӣ дар соҳаи назорат бо СПИД, сил ва вараҷа дар Ҷумҳурии Тоҷикистон изҳор намуданд.

Намояндагони ЮСАИД гуфтанд, ки гранти ЮСАИД барои аз байн бурдани бемории сил дар Осиёи Марказӣ, аз ҷумла дар Тоҷикистон оғоз хоҳад шуд. Он  аз ҷониби UPAssosiat ба муҳлати 5 сол ба маблағи 31,6 миллион доллари ИМА  татбиқ карда мешавад ва  15,2 миллион доллари он ба Точикистон фиристода мешавад.

Дар ҷараёни вохӯрӣ намояндаи Фонди глобалӣ Алан Набиев инчунин ба раиси КММ дар бораи муҳлати пешниҳоди аризаҳои навбатӣ барои Гранти Хазинаи Глобалӣ оид ба мубориза бо ВНМО/СПИД ва сил, ки то 23 марти соли 2020 муайян карда мешавад, маълумот дод.

Онҳо инчунин лоиҳаи Нақшаи кори Кумитаи миллии ҳамоҳангсозӣ   барои соли 2020 ва Нақшаи кори Комиссияи назоратии Кумитаи миллии ҳамоҳангсозӣ    барои соли 2020-ро баррасӣ ва тасдиқ карданд.

Дар мулоқот Азим Иброҳим иброз намуд, ки баррасии ҳамаҷонибаи ин масъала таҳти таваҷҷуҳи роҳбарияти мамлакат қарор дорад ва аз ин рӯ, сохторҳои масъул вазифадор карда шуданд, ки тамоми уҳдадориҳои худро сари вақт ва бо сифати баланд иҷро намоянд.

Ноябрь 18, 2019 18:00

Хабарҳои дигари ин бахш

«Сомон Эйр» модули фармоиши чиптаҳоро ба кор андохт
ИСТИҚЛОЛИЯТИ ЭНЕРГЕТИКӢ. Бо кадом роҳҳо метавон ба он ноил гардид?
Форуми II байналмилалии «Суғд-чорроҳаи роҳи бузурги абрешим» гузаронида мешавад
ТО ШАБАКАҲОИ 5G ИНКИШОФ ДОДАНИ ИНФРАСОХТОРИ РАҚАМӢ. Ҷиҳати пешбурди иқтисоди рақамӣ тақвияти кор дар чанд самти асосӣ таъкид гардид
Сарвари давлат: «То охири соли 2025 пардохтҳои ғайринақдӣ дар соҳаҳои буҷетӣ ва хизматрасониҳои давлатӣ пурра таъмин карда шаванд»
Нақши Паёми Президенти Ҷумҳурии Тоҷикистон ба Маҷлиси Олӣ дар гузаронидани ислоҳоти иқтисодӣ бузург мебошад
РУШДИ ТОҶИКИСТОН ТАВАССУТИ РАҚАМИКУНОНӢ, ЗЕҲНИ СУНЪӢ ВА НИЗОМИ МАОРИФИ ПЕШРАФТА. Бардошт аз Паёми Президенти Ҷумҳурии Тоҷикистон ба Маҷлиси Олӣ
ИСТИҚЛОЛИЯТИ ЭНЕРГЕТИКӢ-ЯКЕ АЗ ҲАДАФҲОИ СТРАТЕГИИ ҲУКУМАТИ ТОҶИКИСТОН. Моҳи майи соли 2027 Тоҷикистон ба истиқлоли комили энергетикӣ ноил мегардад
Эмомалӣ Раҳмон: «Соли 2025 дар вилояти Суғд сохтмони неругоҳи барқи офтобӣ бо иқтидори 200 мегаватт оғоз мегардад»
Дар Тоҷикистон «Стратегияи ҷалби сармоя барои давраи то соли 2040» таҳия мегардад
Пешвои миллат: «Дар панҷ соли охир суръати рушди иқтисоди миллӣ ба ҳисоби миёна 7,7 фоизро ташкил дод»
Истеҳсоли маҳсулоти кишоварзӣ дар Тоҷикистон аз 39 миллиард сомонӣ ба 73 миллиард сомонӣ расонида шуд