Данғара мизбони Фестивали фарҳангии ҷавонони хориҷӣ мегардад

ДУШАНБЕ, 26.02.2020 /АМИТ «Ховар»/. 18 март  дар ноҳияи Данғараи вилояти Хатлон Фестивали фарҳангии ҷавонони  хориҷӣ таҳти унвони «Дӯстии ҷавонони ҷаҳон поянда бод» доир мегардад. Фестивали мазкур дар доираи тантанаҳои ҷашни Наврӯзи байналмилалӣ  баргузор шуда, дар он беш аз 300 нафар ҷавонон аз давлатҳои гуногуни ҷаҳон, намояндагони корпуси дипломатӣ, роҳбарону намояндагони созмонҳои минтақавию ҷаҳонӣ иштирок менамоянд.

Дар ин бора ба АМИТ «Ховар» роҳбари маҳфили «Ҷавонони дар хориҷи кишвар таҳсилдошта» Каримҷон Салимзода хабар дод.

Ба иттилои манбаъ, Фестивали фарҳангии ҷавонони хориҷӣ соли дуюм аст, ки аз ҷониби маҳфили «Ҷавонони дар хориҷи кишвар таҳсилдошта»- и Кумитаи кор бо ҷавонон ва варзиш роҳандозӣ шуда, ҳадаф аз он  мустаҳкам намудани дӯстии ҷавонони ҷаҳон,  ҳамгироиву ҳамдигарфаҳмӣ, муаррифии фарҳангҳои ҳамдигар, ташаккули ҳисси ватандӯстии ҷавонон  ва тақвият додани  ҳамкориву дастгирии ҷавонони олам  мебошад.

Фестивали фарҳангии ҷавонон аз бахшҳои мухталиф иборат буда, дар он рақсу тарона ва сурудҳои дилнишин бо забонҳои гуногун  қироат карда мешаванд. Дар барномаи он ҷавонони хориҷӣ бо забонҳои тоҷикӣ суруд месароянд.

Инчунин ҳайати иштирокчиён аз шаҳри Норак, мавзеъҳои фарҳангӣ, фароғатӣ, таърихӣ ва Ҷамоати деҳоти Пушинги ноҳияи Данғара дидан мекунанд.