Раиси ШСХК «Барқи Тоҷик» Мирзо Исмоилзода: «Бо мақсади аз байн бурдани ҳолатҳои коррупсионӣ истифодаи варақаҳои пардохти рақамдор пурра манъ гардид»

Февраль 11, 2020 16:45

ДУШАНБЕ, 11.02.2020. /АМИТ «Ховар»/. Ҳоло дар ҳамаи шабакаҳои барқӣ истифодаи ва­ра­қаҳои пардохти рақамдор (квитансияҳо) пурра манъ карда шудааст.Баҳисобгирии масрафи барқ ва қабули пар­дохт­ҳо тавассути барномаҳои тарҳрезигардида ба роҳ монда мешаванд, ки ин  ҳолатҳои азхуд­кунии маблағҳоро пешгирӣ намуда, барои  аз байн бурдани ҳолатҳои коррупсионӣ мусоидат менамояд. Ин матлабро имрӯз зимни нишасти матбуотӣ Раиси Ширкати саҳомию холдингии кушодаи «Барқи Тоҷик» Мирзо Исмоилзода иброз намуд.

«Дар 64 шабакаҳои барқии минтақавӣ, шаҳрӣ ва ноҳия­вии зертобеи ширкат низоми биллингии муосир аз тарафи ширкатҳои ватанӣ тарҳрезӣ шудааст. Аз ҷумла, кори системаи билингии “Express Client” дар 24 шабакаҳои барқӣ ва “Tajbilling» дар 39 шабакаҳои барқӣ пурра тарҳ­резӣ ­гардидаанд. Инчунин ҳамаи гурӯҳҳои истифодабарандагон ба барномаҳои мазкур ворид карда шуда, бахши ҳисоббаробаркунӣ аз баҳисобгирии китобӣ ба системаҳои биллингӣ ба роҳ монда шуда истодааст»,-илова намуд номбурда.

Баҳри ба роҳ мондани ҳисоби дурусти хароҷоти неруи барқ аз тарафи зерсохторҳои Ширкати «Барқи Тоҷик» дар давраи аз моҳи сентябри соли 2018 то 1 январи соли 2020 дар воридаҳои 0,4 кВ-и истгоҳҳои трансформатории 6-10/0,4 кВ, дар маҷмӯъ 5416 адад ҳисобкунакҳои барқии куҳна ба ҳисобкунакҳои барқии электронии интеллектуалии замо­навӣ иваз  гардидаанд.

Инчунин бо мақсади ба роҳ мондани ҳисоби дурусти неруи барқ соли 2019 ба миқдори 24086 адад ҳисобкунакҳои барқии муштариён аз даруни ҳав­лиҳо ва 4386 адад аз даруни хонаҳои баландошёна ба ҷои намоён бароварда шудаанд.

Бино ба  маълумоти Раиси ширкат, соли 2019 аз тарафи зерсохторҳои ШСХК “Барқи Тоҷик” дар маҷмӯъ 25094 ҳолатҳои истифодаи ғайри­қо­ну­нии неруи барқ ба миқдори 124,2 млн. кВт.соат ошкор гардида, санадҳои дахлдор ба маблағи 39,2 млн. сомонӣ тартиб дода шуд. Аз ин ҳисоб 19,7 млн. сомонӣ, маблағи ҳисо­би­шуда пардохт карда шудааст. Дар айни замон, аз тарафи зер­сох­тор­ҳои ширкат, дар доираи қоидаҳои амалкунанда ҷиҳати ситонидани маблағҳои боқимонда корҳо идома доранд.

Бо дастгирии Хукумати Ҷумҳурии Тоҷикистон айни замон, амалисозии лоиҳаи «Иваз намудани ҳисобкунакҳои барқӣ, қисман иваз намудани трансформаторҳои ҷараён ва шиддат, баистифодадиҳии инфрасохтори ҳозиразамони ҳи­соб­кунӣ ва сохтори баҳисобгирӣ» идома дорад, ки дар доираи ин лоиҳа насб намудани таҷҳизоти баҳисобгирии неруи барқ дар зеристгоҳҳои барқии 110 кВ ба нақша гирифта шудааст. Баъди ба пуррагӣ ба анҷом расидани корҳо дар доираи лоиҳаи мазкур ҳисоби талафоти неруи барқ дар хатҳои барқӣ ва тартиб додани тавозуни неруи барқ дар неругоҳҳо, зеристгоҳҳо дар реҷаи вақти реалӣ шаффоф ба роҳ монда мешавад.

Февраль 11, 2020 16:45

Хабарҳои дигари ин бахш

Сарвазири мамлакат Қоҳир Расулзода дар ноҳияи Дӯстӣ бо рафти ҷамъоварии ҳосили пахта ва корҳои созандагӣ шинос гардид
Дар Душанбе таҳкими ҳамкорӣ вобаста ба конфронси СИТЕС баррасӣ шуд
Шуруъ аз 16 сентябр дар масири Сиан-Душанбе парвозҳои мустақими ҳавоӣ оғоз мегарданд
Тоҷикистон ва Иттиҳоди Аврупо ҳамкориро дар соҳаи энергетика ва захираҳои об тақвият медиҳанд
Сарвазири мамлакат Қоҳир Расулзода дар ноҳияи Кӯшониён бо ҷараёни корҳои созандагӣ ва хоҷагидорӣ шинос шуд
Сиёсати Тоҷикистон дар самти идоракунии ҳамгироёнаи захираҳои об дар Шветсия муаррифӣ карда шуд
Бонки аврупоии таҷдид ва рушд барои таҷдиди низоми нақлиёти шаҳри Душанбе маблағ ҷудо менамояд
Дар Минтақаи озоди иқтисодии «Данғара» татбиқи лоиҳаҳои муштарак бо сармоягузорони Чин баррасӣ карда шуд
Дар Неругоҳи барқи обии «Роғун» роботи махсуси кафшерӣ ба истифода дода шуд
Роҳҳои афзоиш додани ҳаҷми истеҳсол ва коркарди нахи пахта дар Тоҷикистон баррасӣ гардид
Дар Чин масъалаи вазъи заминҳои шӯр ва ишқордор баррасӣ шуд
Ангури хуштаъми Тоҷикистон дар бозорҳои шаҳри Самара ба фурӯш гузошта шудааст