«Меҳри модар»-и Дарвоз ба истеҳсоли ниқобҳои тиббӣ ва либосҳои муҳофизатӣ барои табибон шурӯъ кард

ХОРУҒ, 02.05.2020 /АМИТ «Ховар»/. Корхонаи дӯзандагии «Меҳри модар»-и ноҳияи Дарвоз аз даҳаи сеюми моҳи март бо мақсади пешгирӣ аз паҳншавии  бемории КОВИД-19 ба истеҳсоли ниқобҳои тиббӣ ва либоси муҳофизатӣ барои табибон  шурӯъ кард, иттилоъ медиҳад хабарнигори минтақавии АМИТ «Ховар» Файз Мирасан.

Бино ба иттилои ӯ, то имрӯз зиёда аз 35 ҳазор ниқоб истеҳсол намудааст. 15 ҳазор ниқобро бо супориши раиси вилоят ба  муассисаҳои таълимию тандурустӣ ва сокинони ноҳияҳои  вилоят тақдим кард. Дар маҷмӯъ корхонаи мазкур  истеҳсоли 800 адад либосҳои муҳофизатиро бар уҳда гирифтааст.

Муовини аввали раиси ноҳияи Дарвоз Ҳаким Давлтазода ба мухбири АМИТ “Ховар” иттилоъ дод, ки бо дархости сокинони шаҳри Душанбе коргарони корхонаи мазкур 200 ҳазор ниқоби тиббӣ ва ҳазор либоси муҳофизатиро дӯхта, рӯзҳои наздик ба пойтахти ҷумҳурӣ интиқол медиҳанд.