ФУРСАТ ҒАНИМАТ. Дар ноҳияи Ҷаббор Расулов ҷамъоварии ғалладонагиҳо бо маром ҷараён дорад
![](https://khovar.tj/wp-content/uploads/2020/06/Gandum-Sugd.jpg)
ДУШАНБЕ, 24.06.2020. /АМИТ «Ховар»/. Имрӯзҳо дар хоҷагиҳои кишоварзии ҷумҳурӣ, алалхусус вилояти Суғд иҷрои корҳои саҳроӣ, чун ҷамъоварии сабзавоту мевагиҳо, ғундоштани ҳосили картошкаи барвақтӣ, инчунин дарави ғалладонагиҳои хӯшадор ва хошок бо маром ҷараён доранд. Аз ҷумла, дар майдонҳои гандумзори ноҳияи Ҷаббор Расулови вилояти Суғд ҷараёни ҷамъоварии ҳосили ғалла бо истифода аз обу ҳавои мусоид ва техникаҳои кишоварзӣ муташаккилона идома дорад.
Тавре Азиз Набиев, масъули шуъбаи кор бо ВАО-и мақомоти иҷроияи ҳокимияти давлатии ноҳияи Ҷаббор Расулов ба хабарнигори минтақавии АМИТ «Ховар» хабар дод, имрӯзҳо кишоварзони ноҳия ҷиҳати сари вақт ва босифат кишт ва ҷамъоварӣ намудани ҳамаи зироатҳои кишоварзӣ, таъмини амнияти озуқаворӣ, ғанӣ гардонидани дастархони мардум ва дар сатҳи дастрас нигоҳ доштани нарху навои маҳсулоти озуқаворӣ корҳои назаррасро анҷом дода истодаанд.
Ба хусус, айни ҳол дар ноҳия маъракаи ҷамъоварии ғалла бо вусъат идома дошта, ҳамарӯза дар майдони 200-210 гектар дарави ғалладонагиҳо гузаронида шуда истодааст.
Зикр гардид, ки соли ҷорӣ дар ноҳия ҳамагӣ дар майдони 4369,3 гектар ғалладонагиҳо кишт шуда, аз он 1947,4 гектарашро гандум, 2400,1 гектарро ҷав ва 21,8 гектарро лӯбиёгиҳо ташкил медиҳад.
Баробар ба 23-июни соли ҷорӣ дар ноҳия 3867 гектар замин дарав шуда, ҳосилнокии умумии миёна аз ҳар гектар 25,8 сентнериро ташкил намуда, аз он ҳосилнокии заминҳои обӣ 39,3 сентнер ва заминҳои лалмӣ 9,7 сентнерро дар бар мегирад.