Бонки миллӣ ба «Хона-интернати беморони рӯҳии шаҳри Ҳисор» 1 тонна маводи хӯрока кумак намуд

ДУШАНБЕ, 30.12.2020/АМИТ «Ховар»/. Дар арафаи Соли нави мелодӣ Бонки миллии Тоҷикистон ба бошандагони Муассисаи давлатии «Хона-интернати беморони рӯҳии шаҳри Ҳисор» кӯмак расонид. Кӯмак аз 1 тонна маводи хӯрока – шириниҳо, равған, биринҷ, марҷумак, макарон ва дигар маҳсулоти  донагӣ, инчунин 14 номгӯй либосҳои зимистона,  дастгоҳи гармидиҳандаи барқӣ, 240 адад туҳфаи солинавӣ, маводи гигиенаи шахсӣ барои беҳдошти вазъи саломатӣ иборат мебошад. Роҳбарияти Бонки миллии Тоҷикистон бо шароити зисти бошандагони муассисаи мазкур шинос шуда,  маводи  зикршударо дастраси онҳо гардониданд.

Мавриди  зикр аст, ки ятимону бепарасторон таҳти таваҷҷуҳи доимии Ҳукумати Ҷумҳурии Тоҷикистон, хоса Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон қарор дошта, ғамхорӣ дар ҳаққи  ятимону маъюбон, оилаҳои камбизоат, шахсони ниёзманад ва дастгирии ҳамешагии онҳо,  аз ҷумлаи самтҳои муҳими сиёсати иҷтимоии роҳбарияти давлату Ҳукумати Ҷумҳурии Тоҷикистон маҳсуб меёбад.