ГӮШТ ЗИЁД ШУД. Дар Тоҷикистон саршумори ҳайвоноти калони шохдор ва истеҳсоли гӯшт зиёд шуд

ДУШАНБЕ, 16.12.2020 /АМИТ «Ховар»/. Дар Тоҷикистон ҳаҷми истеҳсоли гӯшти чорвои калони шохдор ва ҳайвоноти майда 5,5% афзоиш ёфт, иттилоъ медиҳад АМИТ «Ховар» бо истинод ба Агентии омори назди Президенти Ҷумҳурии Тоҷикистон. Шумораи умумии маҳсулоти гӯштӣ аз 170,8 ҳазор тонна зиёд шудааст.

Истеҳсоли гӯшт чунин афзоишро дар 10 моҳи аввал нисбат ба соли гузашта нишон дод.

Тибқи маълумоти Агентии омор, саршумори чорвои калони шохдор дар ҳама категорияҳои хоҷагиҳои деҳқонӣ зиёда аз 2,3 миллион сарро ташкил медиҳад, ки  нисбат ба як соли пеш 20,4 ҳазор сар ё 0,9% зиёд аст.

Ғайр аз ин, истеҳсоли гӯшти мурғ дар ҷумҳурӣ аз аввали соли равон беш аз 1,9 маротиба афзудааст.

Тибқи маълумоти Вазорати кишоварзии ҷумҳурӣ, дар моҳҳои январ-октябри соли равон дар мамлакат беш аз 22,8 ҳазор тонна гӯшти мурғ истеҳсол шудааст, ки нисбат ба ҳамин давраи соли гузашта 1,9 маротиба зиёд аст.

АКС: аз Sputnik