Китобхонаи дастгоҳи Маҷлиси намояндагон замонавӣ гардонида шуд

ДУШАНБЕ, 11.12.2020 /АМИТ «Ховар»/. Имрӯз китобхонаи Дастгоҳи Маҷлиси намояндагони Маҷлиси Олии Ҷумҳурии Тоҷикистон  дар шакли  нав  ба қабули хонандагон ва ниёзмандон оғоз намуд. Ин махзани маърифату иттилоъ бо мизу курсиҳои нав, рафҳову ҷевонҳо, тахтаи электронӣ ва дигар василаҳои муосири китобхонаҳо муҷаҳҳаз гардида, дорои осори зиёди адабию тахассусӣ гардид. Дар  ин бора котиби матбуотии Маҷлиси намояндагон Маҷлиси Олии Ҷумҳурии Тоҷикистон Муҳаммадато Султонов ба хабарнигори АМИТ “Ховар” иттилоъ дод.

Дар Китобхонаи Маҷлиси намояндагон барои китобҳои Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон гӯшаи махсус таъсис дода шуда, ҳамарӯза хонандагон аз он баҳра  мебардоранд.

Фонди умумии китобхонаи мазкур  беш аз 17 ҳазор нусха китобҳои гуногуни тахассусӣ, илмию адабӣ, луғату қомусҳои соҳавиро фаро гирифта, аз рӯи хоҳиш пешкаши хонандагон карда мешаванд.

Инчунин дар ин даргоҳи илму маърифат  нашрияҳои даврӣ ва махсусан «Ахбори Маҷлиси намояндагон», рӯзномаҳои «Садои мардум», «Ҷумҳурият», «Минбари халқ», «Народная газета», «Халқ овози» ва дигар  рӯзномаю маҷаллаҳои  даврӣ гирдоварӣ шуда, барои ниёзмандон пешниҳод мегарданд.

Ёдрас мешавем, ки Китобхонаи дастгоҳи Маҷлиси намояндагон соли 1992 таъсис ёфта, баъд аз ба фаъолияти касбӣ шурӯъ намудани парламенти тоҷик зарурати таъмин ва такмили китобхона афзуда, шумораи китобҳо ва хонандагонаш низ марҳмила ба марҳилда зиёд гардидааст.