Бонки ҷаҳонӣ: дар соли 2021 суръати афзоиши иқтисодӣ дар Осиёи Марказӣ 3% ва дар Тоҷикистон 3,5%-ро ташкил хоҳад дод

Январь 7, 2021 15:14

ДУШАНБЕ, 07.01.2021 /АМИТ «Ховар»/. Таҳлилгарони Бонки ҷаҳонӣ дар гузориши нави худ «Дурнамои иқтисоди ҷаҳонӣ: Аврупо ва Осиёи Марказӣ» афзоиши маҷмӯи маҳсулоти дохилӣ (ММД)-ро дар Осиёи Марказӣ, аз ҷумла Тоҷикистон барои солҳои оянда пешгӯӣ карданд.

Тибқи пешгӯиҳо, афзоиши иқтисодии минтақа дар соли 2021 муътадил хоҳад буд. «Интизор меравад, ки имсол суръати афзоиши иқтисодӣ дар Осиёи Марказӣ то 3% барқарор мешавад, ки ба он афзоиши муътадили нархҳои молӣ ва сармоягузории мустақими хориҷӣ ба ҳадди фаъолгардии иштироки минтақа дар татбиқи ташаббуси пешниҳоднамудаи Чин «Як камарбанд – як роҳ» мусоидат менамоянд», — гуфта мешавад дар гузориш.

Бино ба дурнамои Бонки ҷаҳонӣ, афзоиши ММД-и Тоҷикистон дар соли 2021 3,5 ва дар соли 2022 — 5,5%-ро ташкил хоҳад дод. Ин нишондиҳандаҳо дар Қазоқистон мутаносибан ба 2,5% ва 3,5%, дар Қирғизистон — 3,8% ва 4,5%, дар Ӯзбекистон — 4,3% ва 4,5% баробаранд.

Ҳамзамон таҳлилгарон зикр менамоянд, ки дурнамои афзоиши иқтисодӣ дар Осиёи Марказӣ, алалхусус бо назардошти паҳн шудани штамми нави коронавирус ва зиёд гардидани беморӣ бисёр номуайян аст.

Ёдовар мешавем, ки қаблан Бонки рушди Авруосиё (БРА) низ дар бораи суръати афзоиши иқтисодии Тоҷикистон пешгӯӣ карда буд. Ба гуфтаи коршиносони БРА, Тоҷикистон бо натиҷаи мусоид метавонад суръати динамикаи ММД-ро тадриҷан барқарор кунад ва то соли 2022 ба афзоиши қаблӣ баргардад.

Дар гузориши Бонки ҷаҳонӣ инчунин омадааст, ки дар тӯли 15 моҳ — то охири моҳи июни соли 2021 — Гурӯҳи Бонки ҷаҳонӣ ба зиёда аз 100 кишвари ҷаҳон барои ҳимояи камбизоатон ва қишри осебпазир, дастгирии соҳибкорон ва суръат бахшидан ба барқарорсозии иқтисодиёт то 160 миллиард доллари ИМА кумаки молиявӣ мерасонад. Ин маблағ аз ҳисоби манбаъҳои нави Ассотсиатсияи байналмилалии рушд дар ҳаҷми 50 миллиард доллари ИМА дар шакли грантҳо ва қарзҳои имтиёзнок ва 12 миллиард доллари ИМА, ки ба кишварҳои рӯ ба тараққӣ барои маблағгузорӣ ҷиҳати харид ва тақсими ваксинаҳои зидди COVID-19 ҷудо карда мешавад, иборат аст.

АКС аз бойгонӣ

Январь 7, 2021 15:14

Хабарҳои дигари ин бахш

Дар Душанбе таҳкими ҳамкорӣ вобаста ба конфронси СИТЕС баррасӣ шуд
Шуруъ аз 16 сентябр дар масири Сиан-Душанбе парвозҳои мустақими ҳавоӣ оғоз мегарданд
Тоҷикистон ва Иттиҳоди Аврупо ҳамкориро дар соҳаи энергетика ва захираҳои об тақвият медиҳанд
Сарвазири мамлакат Қоҳир Расулзода дар ноҳияи Кӯшониён бо ҷараёни корҳои созандагӣ ва хоҷагидорӣ шинос шуд
Сиёсати Тоҷикистон дар самти идоракунии ҳамгироёнаи захираҳои об дар Шветсия муаррифӣ карда шуд
Бонки аврупоии таҷдид ва рушд барои таҷдиди низоми нақлиёти шаҳри Душанбе маблағ ҷудо менамояд
Дар Минтақаи озоди иқтисодии «Данғара» татбиқи лоиҳаҳои муштарак бо сармоягузорони Чин баррасӣ карда шуд
Дар Неругоҳи барқи обии «Роғун» роботи махсуси кафшерӣ ба истифода дода шуд
Роҳҳои афзоиш додани ҳаҷми истеҳсол ва коркарди нахи пахта дар Тоҷикистон баррасӣ гардид
Дар Чин масъалаи вазъи заминҳои шӯр ва ишқордор баррасӣ шуд
Ангури хуштаъми Тоҷикистон дар бозорҳои шаҳри Самара ба фурӯш гузошта шудааст
Рақамикунонии соҳаи замин дар Тоҷикистон бо ҳайати Бонки рушди Осиё баррасӣ шуд