Президенти Тоҷикистон ва Дабири кулли СММ доир ба шадидтарин буҳрони иқтисодии аср ибрози андеша намуданд
ДУШАНБЕ, 26.01.2021 /АМИТ «Ховар»/. Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон бар онанд, ки дар натиҷаи пандемияи коронавирус имрӯз ҷаҳон ба буҳрони бисёр шадиди иқтисодӣ дар 100 соли охир рӯ ба рӯ омад. Дар ин бора Пешвои миллат имрӯз зимни ироаи Паёми навбатии худ ба Маҷлиси Олии Ҷумҳурии Тоҷикистон изҳор доштанд.
Бино ба гуфтаи Сарвари давлат, соли 2020 барои сокинони сайёра, аз ҷумла Тоҷикистон яке аз солҳои аз ҳар лиҳоз вазнин буд. Дар натиҷаи паҳн шудани бемории сироятии коронавирус ва вобаста ба он, босуръат паст рафтани фаъолнокии иқтисодӣ ва афзоиши бесобиқаи бекорӣ вазъияти сайёра боз ҳам печида гардида, ба буҳрони бисёр шадиди иқтисодиву молиявӣ ва иҷтимоӣ рӯ ба рӯ омад.
«Имрӯз дар дунё амалан давлат ва соҳае нест, ки аз таъсири буҳрон эмин монда бошад. Мувофиқи арзёбии коршиносони байналмилалӣ, чунин буҳрони шадиду фарогир дар сад соли охир бори аввал ба миён омада, боиси таназзули ҷиддии иқтисодиёти ҷаҳон гардид», — тазаккур доданд Пешвои миллат.
Тавре Президети Тоҷикистон таъкид доштанд, пайомадҳои пандемия ба иқтисодиёти кишварҳои ҷаҳон, аз ҷумла ба рушди иқтисоди миллӣ, буҷети давлатӣ, гардиши савдои хориҷӣ, қурби асъори миллӣ, инчунин ба фаъолияти корхонаҳои саноативу муассисаҳои хизматрасонии мо низ таъсири манфии худро расонида истодаанд.
«Яъне, — зикр намуданд муҳтарам Эмомалӣ Раҳмон, — мо соли 2020 дар вазъияти бошиддати иқтисодиву молиявии ҷаҳонӣ фаъолият карда, бо вуҷуди мушкилоти пешомада ҷиҳати пешгирӣ намудани пайомадҳои буҳрон ва ҳифзи амнияти иқтисодии мамлакат якчанд чораҳои фавриро роҳандозӣ кардем».
Худи ҳамин андешаро Дабири кулли СММ Антониу Гутерриш низ дирӯз, 25 январ зимни суханрониаш дар чорабинии «Рӯзномаи Давос» иброз дошт. Тавре АМИТ «Ховар» иттилоъ медиҳад, матни суханронии ӯ имрӯз дар сомонаи расмии созмон нашр шудааст.
ДАР АКС: Дабири кулли СММ Антониу Гутерриш. Акс аз GLOBAL LOOK PRESS
Дабири кулли СММ тазаккур дод, ки вазъи имрӯзаи ҷаҳонро метавон бо як калима – «зудшиканӣ» тавсиф кард.
«Беш аз 2 миллион нафар фавтиданд (бинобар пандемия, — тавзеҳи АМИТ «Ховар») ва мо дар вазъи шадидтарин буҳрони иқтисодӣ дар сад соли охир қарор дорем», — гуфт Гутерриш.
Дабири кулли СММ илова намуд, ки пандемия чунин мушкилоти ҷаҳон, ба монанди нобаробарӣ байни мардум ва кишварҳо, ноустувории «буҳрони иқлим ва гуногунии биологӣ»-ро фош кард. Гутерриш ҷаҳонро ба муколама ва ҳамкорӣ даъват мекунад.
«Ҳукуматҳо, созмонҳои байналмилалӣ, бахши хусусӣ, ҷомеаи шаҳрвандӣ ва шаҳрҳо бояд якҷоя кор кунанд», — гуфт ӯ.
Дабири кулли СММ таъкид кард, ки соли 2021 ҷаҳон имкони беназири истифодаи барқароршавӣ аз пандемияро барои «гузаштан аз зудшиканӣ ба устуворӣ» дорад.
Илова бар ин, Гутерриш гуфт, ки таъхир дар паҳн кардани ваксинаҳо ва инчунин мутатсияи коронавирус метавонад боиси марги бештар аз сирояти бемории COVID-19 гардад. Ӯ аз кишварҳое, ки ваксинаҳо сохтаанд, даъват кард, ки истеҳсоли доруҳоро ба таври назаррас афзоиш диҳанд ва дастрасии ҳамаҷонибаи онҳоро таъмин кунанд.
АКС аз AP 2020
Президенти Комиссияи Иттиҳоди Аврупо Урсула фон дер Ляйен аз иқтидори бузурги Неругоҳи азими барқи обии «Роғун»-и Тоҷикистон ёдовар шуд
Президенти Тоҷикистон тавсеаи ҳамкории давлатҳои Осиёи Марказиро бо Иттиҳоди Аврупо дар соҳаи энергетикаи «сабз» аз самтҳои ояндадор номиданд
Эмомалӣ Раҳмон: «Пиряхҳои Тоҷикистон танҳо манбаи об барои минтақа набуда, дар нигоҳдории иқлими минтақа низ нақши муҳим мебозанд»
Инъикоси густурдаи таҷлили Ҷашни байналмилалии Наврӯз бо иштироки Сарони се давлати Осиёи Марказӣ дар расонаҳои хабарии минтақаю ҷаҳон ва шабакаҳои иҷтимоӣ
Эмомалӣ Раҳмон: «Натиҷаҳои вохӯриҳои имрӯзаро мо ҳамчун пайки таҷдид ва оғози марҳилаи сифатан нав дар муносибатҳои се кишвар медонем»
Президенти Тоҷикистон: «Худдорӣ намудан аз ҳама гуна зиёдаравию исрофкорӣ вазифаи ҳар бандаи муъмин дар ҳама ҳолат, аз ҷумла дар айёми ид мебошад»
23 март-Рӯзи ҷаҳонии обуҳавошиносӣ. Дар ҳар се соат ҳавошиносони тоҷик ба Хадамоти ҷаҳонии ҳавошиносӣ маълумот пешниҳод менамоянд
«НАВРӮЗ ДАР АСЛ ҶАШНИ ЗИНДАГИСОЗ АСТ». Иқтибос аз суханрониҳои Президенти Ҷумҳурии Тоҷикистон
ИМРӮЗ-РӮЗИ БАЙНАЛМИЛАЛИИ ҲИФЗИ ПИРЯХҲО. Ҳифзи пиряхҳо аз обшавии босуръат ҳамкории дастҷамъонаи давлатҳо ва созмонҳои байналмилалиро тақозо менамояд
Пешвои миллат: «Тоҷикистони маҳбуби мо воқеан Ватани аслии Наврӯз аст»
Бузургии Зан-Модар- ин олиҳаи ҳаёт ҳамеша вирди забони башарият аст
Рӯзи Модар рамзи эҳтиром ва қадршиносии махсуси давлату ҳукумати Тоҷикистон нисбат ба Зан-Модар мебошад
